मन्त्रिपरिषद् बैठकद्वारा आगामी आर्थिक वर्षको बजेट पारित

१५ जेठ, काठमाडौं । सोमबार दिउँसो बसेको मन्त्रिपरिषद् बैठकले सरकारले तयार पारेको आगामी आर्थिक वर्षको बजेट पारित गरेको छ । प्रधानमन्त्री तथा मन्त्रिपरिषद्को कार्यालय सिंहदरबारमा बसेको बैठकले बजेट पारित गरेको हो । 

आज बेलुका ४ बजे अर्थ मन्त्री प्रकाशशरण महतले आगामी आर्थिक वर्षको बजेट प्रस्तुत गर्दैछन् । यस्तै मन्त्रिपरिषद् बैठकले प्रधानमन्त्री प्रचण्डको चार दिने भारत भ्रमणको विषयमा पनि निर्णयहरु लिएको छ । प्रम प्रचण्डले ५ मन्त्री, डेढ दर्जन सचिवसहित जम्बो टोलीसाथ यही जेठ १७ गतेदेखि २० गतेसम्म भारतको भ्रमण गर्दैछन् । 

गएको पुष १० मा प्रधानमन्त्रीमा नियुक्त भएयता पहिलो विदेश भ्रमण भारतबाट गर्न लागेका हुन् । यसअघि मुलुकमा गणतन्त्र घोषणपछि २०६४ मा प्रधानमन्त्री पहिलो हुँदा चीनबाट विदेश भ्रमण सुरु गरेका थिए । त्यस भ्रमणलाई लिएर प्रचण्ड चीनतर्फ ढल्किन पुगेको चर्चा भएको थियो ।