राजनीतिक स्वार्थकेन्द्र बन्दै कोशी अस्पतालः जाने बेलामा कर्मचारी नियुक्तिमा अस्पताल विकास समिति सक्रिय

१५ जेठ, विराटनगर । कोशी प्रदेशको राजधानी विराटनगर स्थित प्रदेशकै ठूलो सरकारी स्वास्थ्य संस्था कोशी अस्पताल पछिल्लो समय राजनीतिक नेताहरूको स्वार्थ पूरा गर्ने केन्द्र बन्दै आएको छ ।

संघीय सरकार मातहतमा रहेको कोशी अस्पताल विकास समितिले आफ्नो पदावधि सकिन एक महिना बाँकी रहेको मौका छोपी आफ्ना निकटका र आफ्ना नातेदारलाई कर्मचारी नियुक्ति गर्न अस्पतालका मेडिकल सुपरिटेन्डेन्टलाई व्यापक दवाव दिएको रहस्य खुलेको हो ।

कोशी अस्पतालमा तत्कालीन केपी ओली नेतृत्वको सरकारका स्वास्थ्य मन्त्री भानुभक्त ढकालले आफ्ना कार्यकर्ता महेश भट्टराईलाई कोशी अस्पताल विकास समितिमा तीन वर्षका लागि अध्यक्षमा नियुक्ति गरेका थिए । अध्यक्ष भट्टराईको आगामी असार २३ गते तीन वर्ष पुरा भई जाने अवस्थामा आइपुगेपछि गत हप्ता मात्रै अस्पताल विकास समितिले कार्यालय समय सकिएपछि बेलुकी ६ बजेपछि बैठक बसेर अस्पतालमा कर्मचारी नियुक्ति गर्ने निर्णय गरेको रहस्य बाहिरिएको छ ।

यसरी अस्पताल विकास समितिले गरेको निर्णयमा अस्पतालका मेडिकल सुपरिटेन्डेन्टले समर्थन गर्नुपर्ने अनिवार्य व्यवस्थाका कारण विकास समितिको निर्णय सार्वजनिक नगरिएको अस्पताल स्रोतले बताएको छ । अर्कोतिर आफू पदावधि सकिएर घर जाने बेलामा विकास समिति अध्यक्ष भट्टराईले राजनीतिक निर्णयबाट कर्मचारी नियुक्ति गर्न खोजिएको भन्दै जिल्ला प्रशासन कार्यालय मोरङले उक्त कर्मचारी नियुक्ति रोक्न निर्देशन दिएको स्रोतले बतायो ।

यस्ता प्रकरणहरुले गर्दा पछिल्लो समय कोशी अस्पतालमा राजनीतिक र व्यक्तिगत स्वार्थ हावी गराउने प्रवृत्ति मौलाइरहेको विषयलाई उजागर गरेको छ । यो प्रकरणले गत फागुन २ गते निमित्त मेसुको जिम्मेवारी पाएका वरिष्ठ कन्सल्टेण्ट सर्जन डा. रविनराज सिंहलाई कार्यकाल सुरु भएको २ महिना पूरा नहुँदै अस्पताल विकास समितिले व्यापक दवाव दिएको रहस्य पनि उजागर भएको छ । 

कोशी अस्पतालमा सेवा सुविधा विस्तार गर्ने भन्दा पनि आफ्ना नातेदार र कार्यकर्तालाई अस्पतालको कर्मचारी नियुक्ति गरेर संघीय सरकार मातहतको अस्पताललाई सिध्याउन केही समय पछि घर जान लागेको अस्पताल विकास समिति अहिले सक्रिय रहेको छ । पछिल्लो समय केही सुधार र विकासको यात्रामा अगाडि बढेको कोशी अस्पताललाई सिध्याउन अस्पताल विकास समिति नै सक्रिय भएर लागेको आशंका गर्न थालिएको छ ।

एकातिर संघीय सरकारले पनि प्रदेशकै ठूलो सरकारी स्वास्थ्य संस्था भएर पनि राजनीतिक स्वार्थसँग जोडेर बारम्बार अस्पतालको मेसु परिवर्तन गर्ने प्रक्रियाले अस्पतालको व्यवस्थापन र सेवाप्रवाहमा प्रत्यक्ष असर परेको कुरा स्वयं चिकित्सकहरू बताउँछन् । अस्पतालको अवस्था बुझ्न नपाउँदै मेसुलाई छोटो अवधिमै जिम्मेवारी मुक्त गर्ने क्रमले गर्दा अस्पतालको व्यवस्थापनमा प्रत्यक्ष असर पुर्याउने गरेको अस्पतालका चिकित्सकहरू स्वीकार गर्ने गर्दछन । 

कोशी अस्पतालमा ११ औँ तहका २ जना चिकित्सक र १० औँ तहका तीन जना चिकित्सक रहेका छन् । २०६१ साल यता अस्पतालमा १७ जना मेसु परिवर्तन भइसकेका छन् । मेसुको परिवर्तन भने सरकार र मन्त्री परिवर्तनसँग प्रत्यक्ष जोडिँदै आएका छन् । अस्थिर मेसुको विगतको नजिरले नै सरकार र मन्त्री परिवर्तन हुना साथ यहाँको विकास समितिका नाममा राजनीतिक नियुक्ति लिएर बसेकाहरू कर्मचारीका नाममा आफ्ना नातेदार देखि पार्टी कार्यकर्ता नियुक्तिमा सक्रिय हुने गरेको कुरा जानकारहरुले बताएका छन ।

३ सय ५० बेड शैया रहेको अस्पतालमा दैनिक २५ सय जनाभन्दा बढी उपचार र स्वास्थ्य परीक्षणका लागि आउने गरेका छन । अस्पतालमा ७ अर्बको लगानीमा भौतिक संरचना निर्माणको काम भइरहेको छ । हाल अस्पतालमा सरकारी दरबन्दीका ८० र विकास समितिका २५ चिकित्सक तथा सरकारी दरबन्दीका ७६ र विकास समितिका ६५ स्टाफ कार्यरत रहँदै आएका छन ।