कृषकलाई सरकारको उपहारः ‘उत्पादन साथमा, अनुदान हातमा’

१५ जेठ, काठमाडौं । सरकारले आगामी आर्थिक वर्षमा कृषि क्षेत्रमा उल्लेख्य बजेट विनियोजित गरेको छ । सोमबार संघीय संसदको संयुक्त बैठकमा सरकारको आगामी आर्थिक वर्ष २०८०/८१ को बजेट प्रस्तुत गर्दै अर्थमन्त्री डा. प्रकाशशरण महतले यस्तो घोषणा गरेका हुन् । 

किसानलाई उत्पादनमा प्रोत्साहनका लागि सरकारले ‘उत्पादन साथमा, अनुदान हातमा’ नारा अगाडि सारेको अर्थमन्त्री महतले बताए । उत्पादनको ५० प्रतिशतसम्म अनुदान दिइने उनले बताए । 

रासायनिक मल अभाव हुन नदिन सरकारले आवश्यक बजेट विनियोजन गरिएको उनले बताए । सरकारले ‘सिक्दै कमाउँदै, रैथानेमा गर्व गरौं भन्ने नारा अगाडि सारेको छ ।

मुलुकका विभिन्न क्षेत्रमा रहेका कृषि उपजका रैथाने बिउ जोगाउने र रैथाने बालीको उपभोगलाई प्रोत्साहन गर्न अनुदानको व्यवस्था गरिएको छ । स्थानीय सरकारको सहकार्यमा ‘खेतबारीमा सेवा, उत्पादनमा टेवा’ कार्यक्रम प्रभावकारी रुपमा संचालन गरिने उनले बताए ।