गाँजा खेती गर्ने बाटो खुल्यो, उत्पादन क्षेत्रको संभाव्यता अध्ययन गर्न बजेट विनियोजन

१५ जेठ, काठमाडौं । अबदेखि देशभित्र गाँजा खेती गर्न पाइने भएको छ । सोमबार संघीय संसदको संयुक्त बैठकमा सरकारको आगामी आर्थिक वर्ष २०८०/८१ को बजेट प्रस्तुत गर्दै अर्थमन्त्री डा. प्रकाशशरण महतले देशभित्र आगामी आर्थिक वर्षदेखि नै गाँजा खेतीका लागि सम्भाव्यता अध्ययन सुरु गरिने बताएका हुन् । 

हाल नेपालको कानुनले गाँजालाई लागू औषधिको सूचीमा राखेर यसको उत्पादन, ओसारपसार तथा सेवन गर्न प्रतिबन्ध लगाएको छ । मन्त्री महतले गाँजा खेतीको लागि मुलुकका विभिन्न क्षेत्रमा सम्भाव्यता क्षेत्रको रुपमा अध्ययन यसै आवबाट सुरु गरिने उनले बताए । यस निम्ति आवश्यक कानुन बनाइने भएको छ ।

अहिले व्यापारीले मकवानपुर, काभ्रे, दाङ, उदयपुर लगायत जिल्लामा लुकीछिपी लगाउने गरेका गाँजा खेती प्रहरी आफैंले कटान र जलाएर नष्ट गर्दै आइरहेको छ । गाँजा उत्पादन, ओसारपसार, बिक्री, वितरण र सेवनमा संलग्नताको आरोपमा हजारौं नागरिक विभिन्न जेलमा छन् । 

यसअघि देखि नै राष्ट्रिय सभा र प्रतिनिधिसभा तथा संसदीय समितिमा सांसदहरुले गाँजालाई जडिबुटीको मान्यता दिएर यसको खेती गर्न आवश्यक रहेको बताउँदै कानुन बनाउनुपर्ने बताउँदै आइरहेका छन् । उनीहरूले नेपाली मदिरालाई ब्राण्डको रुपमा विकास गर्दै विदेशमा निर्यात गरिने व्यवस्था मिलाउन माग गर्दै आइरहेका छन् । 

काठमाडाैँ महानगरपालिकाले नेवारी रक्सीलाई ब्राण्डिङ गर्ने निर्णय गरिसकेकाे छ ।