निर्वाचन क्षेत्र विकास कोष ब्यूँताइयो, एक करोडभन्दा कम लागतको आयोजना छनौट गर्न नपाइने

१५ जेठ, काठमाडौं । सरकारले सांसदको निर्वाचन क्षेत्र विकास कोषलाई पुनः ब्यूँताएको छ । सोमबार संघीय संसदको संयुक्त बैठक आगामी आवको बजेट प्रस्तुत गर्दै अर्थमन्त्री डा. प्रकाशशरण महतले सांसदको निर्वाचन क्षेत्रमा विकासमा खर्च गर्न पाउने गरी हरेक निर्वाचन क्षेत्रमा ५ करोड रूपैयाँ विनियोजन गरिएको जानकारी दिएका छन् । 

उक्त बजेट सांसदको आफ्नो निर्वाचन क्षेत्रमा सडक, पूर्वाधार, सिँचाई लगायत पूर्वाधार निर्माण क्षेत्रमा एउटा आयोजनामा एक करोड खर्च गर्नुपर्ने मन्त्री महतले बताए । ५ करोड बजेट पाँच वटा विकास आयोजनामा मात्र गर्न पाइने व्यवस्था गरिएको उनले बताए । 

अर्थतन्त्र संकटतर्फ गइरहेको बताउँदै सांसदहरु बाटै कोष ब्यूँताउन नहुने भनिरहेका बेला सरकारले कोषलाई ब्यूँताएको हो । विकास गर्ने क्रममा चरम भ्रष्टाचार भएको र निष्पक्ष रुपमा विकास छनौट र विकास नभएको भन्दै एमाले नेतृत्वको सरकारले कोषलाई खारेज गरेको थियो ।