निर्वाचन क्षेत्रमा ५ करोड दिने सरकारकाे निर्णयप्रति मेयर बालेनले भने- ‘बल्ल सांसदहरु वडाध्यक्षको लेबलमा आउनुभयो’

१६ जेठ, काठमाडौं । काठमाडौं महानगरका मेयर बालेन्द्र साह ‘बालेन’ले सरकारले प्रत्यक्ष निर्वाचित संघीय सांंसदलाई आगामी आर्थिक वर्षका लागि ५/५ करोड रुपैयाँका दरले निर्वाचन क्षेत्रमा विकासमा खर्च गर्न पाउने गरी रकम छुट्याउने निर्णय कटाक्ष गरेका छन् । 

सरकारले आगामी आवका लागि सोमबार घोषणा गरेको बजेट वक्तव्यमा ‘निर्वाचन क्षेत्र पूर्वाधार विकास कोषमा’ सांसदले खर्च पाउने गरी हरेक निर्वाचन क्षेत्रका लागि ५ करोड  रुपैयाँ रकम विनियोजन गरिएको उल्लेख छ । मुलुकभरमा संघीय संसद (प्रतिनिधिसभा)को २७५ सिटमध्ये प्रत्यक्षतर्फ १६५ र समानुपातिकतर्फ ११० छन् । सरकारले सांसदहरुर्ला आफ्नो निर्वाचन क्षेत्रमा खर्च गर्न पाउने गरी रकम विनियोजन गरिएको हो । 

कोषको रकम सांसदले जिल्लामा टुक्रे विकासमा वितरण गर्ने र आफ्ना कार्यकर्ता पाल्न र गुण्डागर्दीमा समेत प्रयोग भई चरम भ्रष्टाचार भएको पाइएको भन्दै आलोचना भएपछि दुई वर्षअघि खारेज गरिएको थियो । त्यही कोषलाई आलोचनाबीच अहिलेका गठबन्धन सरकारले ब्यूँताएको हो ।  

कोष ब्यूँताइएपछि मेयर साहले सांसदको हैसियत वडाअध्यक्ष भन्दा फरक नभएको टिप्पणी गरेका छन् । ‘सांसद विकास कोष पाउनु भएसी बल्ल सांसदहरु वडा अध्यक्षको लेबलमा आउनुभयो’ उनले लेखेका छन्, ‘वडा अध्यक्षकै काम गर्न मन भए किन सांसद बन्नु हुन्छ माननीय ज्युहरु ।’

काठमाडौं महानगरपालिकाले एक आवमा झण्डै ८० अर्बको बजेट ल्याउने गरेको छ । एउटै वडा अध्यक्षले एकै आवमा २ अर्ब रुपैयाँसम्म बजेट परिचालन गर्ने गरेका छन् ।