नक्कली भुटानी शरणार्थी मुद्दामा आरोपितहरुको बयान जारी

१६ जेठ, काठमाडौं । नक्कली भुटानी शरणार्थी प्रकरणको मुद्दामा मंगलबार ३ तीन आरोपितको बयान सुरु भएको छ । काठमाडौं जिल्ला अदालतमा न्यायाधीश प्रेमप्रसाद शर्माको इजलासमा आज आरोपितहरु सन्देश शर्मा, इन्द्रजित राई र नरेन्द्र केसीको बयान सुरु भएको हो ।

प्रकरणमा पक्राउ परेका १७ मध्ये यसअघि केशवप्रसाद दुलाल, सागर राई, सन्दीप रायमाझी, लक्ष्मी महर्जन र टंककुमार गुरुङको बयान भइसकेको छ । नक्कली भुटानी शरणार्थी प्रकरणमा जेठ १२ गतेदेखि काठमाडौं जिल्ला अदालतमा आरोपितहरुको बयान सुरु भएको हो । 

प्रकरणमा मुद्दा दर्ता भएका अन्य १३ जना अझै फरार छन् । प्रहरी हिरासतमा रहेका पूर्वउपप्रधान मन्त्रीसमेत रहेका एमाले सांसद टोपबहादुर रायमाझी, पूर्वगृहमन्त्री समेत रहेका नेपाली कांग्रेसका नेता बालकृष्ण खाण, सरकारका सचिव टेकनारायण पाण्डेलगायतको बयान बाँकी छ ।