टेलिकमका प्रबन्ध निर्देशक पौडेलविरुद्ध अख्तियारमा उजुरी

१६ जेठ, काठमाडौं । सरकारको स्वामित्वको नेपाल टेलिकमका प्रबन्ध निर्देशक सुनिल पौडेलविरुद्ध अख्तियाु दुरुपयोग अनुसन्धान आयोगमा उजुरी परेको छ । 

पौडेललाई नियुक्ति गर्दा प्रचलित कानुनको पालना नगरी गैरकानुननी ढंगबाट गरिएको दाबी गर्दै टेलिकमका न्यून वैतनिक कर्मचारीहरूले उजुरी दिएका हुन् । उजुरीमा उनीहरुले अख्तियारीको दुरुपयोग गरी नियुक्ति लिने पौडेललाई कारबाही गर्न पनि उनीहरूले माग गरेका छन् । 

नेपाल दूरसंचार कम्पनीको प्रबन्ध निर्देशक नियुक्तिसम्बन्धी निर्देशिका २०७८ को बुँदा नम्बर १० अनुसार सूचकांकमा कम्तिमा ७०५ अंक हासिल गर्नुपर्ने व्यवस्था रहेकामा पौडेल र तत्कालीन सचिव बैकुण्ठ अर्यालको मिलेमतोमा कार्यसम्पादन सम्झौतामा न्यूनतम कार्यसम्पादन अंकसम्बन्धी उक्त व्यवस्थालाई  संशाेन गराइ ६०५ कायम गरी पौडेललाई नियुक्त गरिएको दाबी उनीहरूले गरेका छन् । मिलेमतोमा सञ्चार तथा सूचना प्रविधि मन्त्रालयले टेलिकमको प्रबन्ध निर्देशक नियुक्तिसम्बन्धी निर्देशिका संशोधन गरेको उनीहरुको आरोप छ ।

बाहिरबाट नियुक्ति पाएका पौडेलकै कारण कम्पनीको कार्यसम्पादन कमजोर भएको र प्रतिस्पर्धी कम्पनीलाई फाइदा पुगेको दाबी उनीहरूले गरेका छन् । राष्ट्रिय सूचना प्रविधि केन्द्रको कार्यकारी निर्देशक रहेका पौडेललाई मन्त्रिपरिषद् बैठकले २०७८ चैत २४ गते चार वर्षका लागि टेलिकमको प्रबन्ध निर्देशकमा नियुक्त गरेको थियो ।