फेरि रोकियो सन्दीपविरुद्ध मुद्दाको अन्तिम सुनुवाइ

१६ जेठ, काठमाडौं । क्रिकेटर सन्दीप लामिछानेविरुद्ध काठमाडौं जिल्ला अदालतमा नाबालिका बलात्कार मुद्दाको अन्तिम सुनुवाइ आज पनि हुन सकेन । 

मुद्दाको अन्तिम फैसलाका लागि जिल्ला न्यायाधीश शंकरबहादुर राईको इजलासमा आजलाई पेसी तोकिए पनि सुनुवाइ रोकिएको हो । किशोरीले क्षतिपूर्ति पाउनुपर्ने माग राखी दिएको निवेदन पनि साथै राखेर सुनुवाइ गर्ने भन्दै न्यायाधीश राईले आज मुद्दाको सुनुवाइ रोकेका हुन् । 

अन्तिम सुनुवाईका लागि यसअघि पटकपटक पेसी तोकिए पनि सर्दै आएको छ । अब अर्को पेसी कहिले तोक्ने भन्नेबारे टुंगो आजै लगाउने तयारी छ । 

अन्तिम सुनुवाइका लागि यसभन्दा अघिल्लो पेसीमा इजलासले वडाबाट पीडितको जन्म दर्ताको सक्कल प्रति झिकाउन आदेश दिएको थियो । 

काठमाडौं जिल्लाको अदालतको थुनछेक सुनुवाइबाट मुद्दा पुर्पक्षका लागि जेल पठाइएका उनी उच्च र सर्वोच्च अदालतको आदेशमा थुनाबाहिर रहेर राष्ट्रियम टिमबाट क्रिकेट खेलिरहेका छन् ।

अभियुक्त सन्दीप नेदरल्यान्ड्स र स्कटल्यान्डसँग मैत्रीपूर्ण खेल खेल्न राष्ट्रिय क्रिकेट टोलीसँग भोलि बुधबार नै दक्षिण अफ्रिका जाँदैछन् । उक्त खेल सकेलगत्तै नेपाली टोली अभ्यास खेल खेल्न जिम्बाबे जानेछ । यूएई र ओमानसँग दुई अभ्यास खेलपछि नेपालको विश्वकप छनोट चरण सुरु हुनेछ । 

विश्वकप छनोटमा नेपाल रहेको समूहमा टेस्ट राष्ट्र वेस्ट इन्डिज र जिम्बावेसँगै अमेरिका र नेदरल्यान्ड्स छन् ।
सन्दीपको मुद्दा छिटो टूंगोमा पुर्याउन माग गर्दै आजै मात्र स्वतन्त्र युवाहरुले काठमाडौं माइतीघर मण्डलामा प्रदर्शन गरेका छन् । उनीहरुले ‘सन्दीपको मुघा छिटो निरुपण गर, सन्दीपलाई न्याय दे’ जस्ता प्लेकार्ड बोकेका थिए ।

यो पनि पढ्नुहोस