अखण्ड भारतको नक्सामा कपिलबस्तु राखिएकोबारे प्रधानमन्त्रीले कुरा गर्नुपर्छः ओली

१६ जेठ, काठमाडौं । नेकपा एमालेका अध्यक्ष केपी शर्मा ओलीले भारतको नयाँ संसद् भवनमा कुँदिएर बनाएको अखण्ड भारतको नक्सा हटाउने विषयमा प्रधानमन्त्री पुष्पकमल दाहाल प्रचण्डले भारत भ्रमणको क्रममा छलफल गर्नुपर्ने बताएका छन् ।

अखिल नेपाल महिला संघले मंगलबार आयोजना गरेको कार्यक्रममा बोल्दै एमाले अध्यक्ष ओलीले नक्साको विषयमा कुरा नगर्ने हो भने भारत भ्रमणमा जानुको औचित्य नहुने बताए । 

उनले भारतको नयाँ संसद् भवनमा काठमा कुँदेर कपिलवस्तु राखिएको आफूले सुनेको ओलीो भनाइ छ । उनले भने, ‘भारतले होइन भने खण्डन गर्यो भने वा हटायो भन्यो भने वा गल्ती महसुस गर्यो भने त्यो आफ्नो ठाउँमा छ । प्रधानमन्त्रीजी भोलि भारत भ्रमणमा जाँदै हुनुहुन्छ उहाँले त्यो हटाउनु होस् त्यो गल्ती सच्याउनु होस् भनेर भारतसँग कुरा गर्नुपर्छ । त्यो त्यति कुरा गर्न सक्नुहुन्न भने भारत भ्रमणमा किन जाने ?’ प्रधानमन्त्री प्रचण्ड बुधबार ४ दिने भारत भ्रमणमा जाँदैछन् ।

कार्यक्रममा ओलीले भारत जस्तो एउटा पुरानो सुदृढ नमुना लोकतन्त्र भएको देशले नेपालको भूमि समेटेर आफ्नो संसद्मा राख्नुलाई उचित भन्न नसकिने बताए । भारतीय प्रधानमन्त्री नरेन्द्र मोदीले उद्घाटन गरेको अखण्ड भारतको मुरालमा नेपाल लुम्बिनी र कपिलवस्तुलाई समावेश गरिएको छ । 

भारतमा आइतबार उद्घाटन भएको नयाँ संसद् भवनमा ‘अखण्ड भारत’को नक्सा भित्तामा अंकित गरिएको छ । सो नक्सामा ‘अखण्ड भारत’ भन्दै नेपालको लुम्बिनी, कपिलवस्तुदेखि पाकिस्तानको तक्षशिलासम्मको क्षेत्रलाई समेटिएको छ । 

संसद्को नयाँ भवनको भारतीय प्रधानमन्त्री नरेन्द्र मोदीले धार्मिक कार्यक्रमसहित आइतबार उद्घाटन गरेका थिए । भारतीय सञ्चार माध्यमहरुले विगतका महत्वपूर्ण अधिराज्य तथा सहरहरुलाई समावेश गरेको जनाएका छन् ।