कोशीमा भोलिदेखि गर्ने भनिएको आमहडताल फिर्ता

१६ जेठ, विराटनगर । आन्दोलनका क्रममा आइतबार गिरफ्तार गरिएका सबै आन्दोलनकारीलाई मोरङ प्रहरीले रिहा गरेको छ । गिरफ्तार भएका ८६ जनामध्ये २६ जना नेता तथा कार्यकर्तालाई मुद्दा चलाउने तयारी गरेका आज आन्दोलनकारी र प्रशासनबीच सहमति बनेपछि उनीहरुलाई रिहा गरिएको हो । 

आज जिल्ला प्रशासन कार्यालयमा भएको छलफलमा आन्दोलनकारीले आन्दोलन शान्तिपूर्ण बनाउने र सुरक्षाकर्मीले दमन नगर्ने विषयमा सहमति भएको छ । सहमति भएसँगै आन्दोलनकारीले भोलि बिहीबारबाट कोशी प्रदेशमा अनिश्चितकालीन आमहडताल (बन्द) गर्ने भनिएको घोषित कार्यक्रम फिताए लिएका छन् । बन्द फिर्ता लिएपछि प्रदर्शन जारी रहने आन्दोलनका अगुवा अर्जुन जम्नेली राईले बताए । माग पूरा नभएसम्म आन्दोलन नरोकिने उनको भनाइ छ ।

आइतबार प्रदेश सांसदहरुलाई बैठकमा सहभागी हुन नदिन भन्दै बिहानैदेखि भएको आन्दोलनमा आन्दोलनकारी र प्रहरीबीच दिनभरजसो झडप चलेको थियो । झडपमा आन्दोलनकारी र प्रहरी दुवै पक्षका धेरै घाइते भएका थिए ।

गएको फागुनमा प्रदेशसभाको बहुमत प्रदेशको नाम कोशी राखेपछि पहिचान पक्षधर समूदायले निरन्तर प्रदर्शन गर्न आइरहेका छन् । उनीहरुले कोशी नाम खारेज गरी पहिचानको आभारमा नामाकरण गर्नुपर्ने मागलाई मुख्य रुपमा अगाडि सार्दै आएका छन् । 

आन्दोनलका क्रममा गएको फागुनमा आन्दोलनकारी पदमबहादुर लिम्बूको ज्यान गएको थियो । उनलाई सरकारले शहीद घोषणा गरिसकेको छ । पहिचान पक्षधर आन्दोलनकारीले सरकारी कार्यालयहरुमा कोशी लेखिएका लेटरप्याड, साइनबोर्ड, स्ट्याम्प लगायत सामाग्री हटाउने र जलाउने कार्यलाई निरन्तरता दिँदै आएका छन् । प्रदेश सांसद, मन्त्री, मुख्यमन्त्रीलाई समेत आक्रमणको निशानामा पार्दै आएका छन् ।

प्रदेशसभामा आइतबारदेखि बजेट अधिवेशन चलिरहेको छ । अधिवेशन अन्तर्गत बैठकमा सांसदहरुले आन्दोनलकारीहरुसँग तत्काल वार्ता गर्न कोशी सरकारसँग माग गरेका थिए