पप्पु र वाईपी कन्ट्रक्सनसहित २३ निर्माण कम्पनी कालो सूचीमा

१७ जेठ, काठमाडौं । सार्वजनिक खरिद अनुगमन कार्यालयले निर्माण व्यवसायी तथा आपूर्तिकर्ता गरी २३ वटा कम्पनीलाई एक सूचना प्रकाशित गरी कालोसूचीमा राखेको छ । विभिन्न निकायहरूको सिफारिसमा ती कम्पनीहरूलाई बुधबार कालोसूचीमा राखिएको हो ।

सूचीमा राखिने कम्पनीहरुमा कलेज अफ इम्प्लोइमेन्ट, पप्पु कन्ट्रक्सन, वाईपी कन्ट्रक्सन, सप्तकोशी जलाधार कम्पनी, एसियन हाइटेक कन्ट्रक्सनलगायत छन् ।

कलेज अफ इम्प्लोइमेन्टलाई ३ वर्ष, पप्पु कन्ट्रक्सनलाई २ वर्ष, वाईपी कन्ट्रक्सनलाई १ वर्ष ६ महिना, सप्तकोशी जलाधार कम्पनी र ओम साई एण्ड कम्पनीलाई १ वर्ष ३ महिनालाई कालोसूचीमा राखिएको सूचनामा जनाइएको छ । बाँकी कम्पनीलाई भने एक/एक वर्षका लागि कालोसूचीमा राखिएको छ ।

काम सन्तोषजनक नगर्ने, दिइएको समयावधिमा निर्माण काम नसकेर अलपत्र पारेका कम्पनीलाई कालोसूचीमा राख्ने कानुनी व्यवस्था छ । सबै कम्पनीलाई बुधबारबाटै कालो सूचीको समय लागू हुने जनाइएको छ ।