नक्कली शरणार्थी प्रकरण : टेकनारायण पाण्डेसहित ३ जनाको बयान जारी

१७ जेठ, काठमाडौं । काठमाडौं जिल्ला अदालतमा नक्कली भुटानी शरणार्थी प्रकरणमा बुधबार थप ३ प्रतिवादीको बयान जारी छ । जिल्ला न्यायाधीश प्रेमप्रसाद न्यौपानेको इजलासमा सचिव टेकनारायण पाण्डे, मुख्य योजनाकार भनिएकामध्ये सानु भण्डारी र गोविन्द चौधरीको बयान लिन थालिएको हो ।

केशवप्रसाद दुलाल, सागर राई, सन्दीप रायमाझी, लक्ष्मी महर्जन, टंककुमार गुरुङ, सन्देश शर्मा, इन्द्रजित राई र नरेन्द्र केसीको बयान लिने काम सम्पन्न भइसकेको छ ।

नक्कली भुटानी शरणार्थी प्रकरणमा ३० जना प्रतिवादी छन् । तीमध्ये १७ जना पक्राउ परिसकेका छन् भने १३ जना फरार छन् । पूर्वगृहमन्त्री समेत रहेका नेपाली कांग्रेसका नेता बालकृष्ण खाण, पूर्वउपप्रधानमन्त्री समेत रहेका एमालेका सांसद टोपबहादुर रायमाझी, सरकारका सचिव टेकनारायण पाण्डे पक्राउ परेकामध्ये उच्च पदस्थ व्यक्ति हुन् ।