‘सशस्त्र विद्रोह’का लागि भन्दै व्यापारीबाट चन्दा संकलन

१७ जेठ, काठमाडौं । ने.क.पा. (माओवादी) नामक संगठनले सशस्त्र जनविद्रोहका लागि भन्दै व्यापारी र विभिन्न व्यवसायीसँग चन्दा संकलनलाई तीव्रता दिएको छ ।

एमसीसी, एपीपी सम्झौता गरेर सरकारले राष्ट्रघाती काम गरेको भन्दै त्यसविरुद्ध संघर्ष र ‘जनकारवाही’ जारी रहेको समेत उक्त पार्टीको दाबी छ । 

पार्टीका केन्द्रीय महासचिव दाबी गर्ने गौरवको नामबाट लेटरप्याडमा आफ्नो पार्टी कुनै शक्ति वा कसैले हराउन नसक्ने अवस्थामा पुगेको दाबी गर्दै सरकार र ठूला पार्टीका नेतृत्वले राष्ट्रघाती र भ्रष्टाचारीलाई कारवाही गर्नुका साटो संरक्षण दिएको जिकिर गरिएको छ । 

उनले राज्य र सरकारद्वारा संरक्षित भ्रष्टाचारी, दलाल, तस्करहरुलाई कारवाही गर्न ‘सत्ता’ र ‘सेना’ परिचालन गर्न रकम खाँचो परेको जनाउँदै आर्थिक सहयोग गर्न व्यापारीसँग याचना गरेका छन् । गोरखाका मुख्य बजारका दर्जनौं व्यापारीलाई पत्र लेखेर चन्दा मागेका छन् ।

हालै व्यापारीलाई लेखेको पत्रमा पार्टीलाई आर्थिक, नैतिक ,भौतिक सहयोग गर्न आग्रह गरिएको छ । यो पार्टीको पूर्ण परिचय भने खुलिसकेको छैन । याे नामकाे पार्टी विधिवत् रूपमा अस्तित्वमा रहेकाे पाइँदैन । उसले आफूलाई जनवादी क्रान्ति सम्पन्न गर्दै वैज्ञानिक समाजवादी व्यवस्था स्थापना गर्ने यात्रामा रहेको दाबी गरिएको छ । 

जबकि मोहन वैद्य ‘किरण’ नेतृत्वको नेकपा (क्रान्तिकारी माओवादी)ले ‘नयाँ जनवादी क्रान्ति’ र विप्लव नेतृत्वको नेकपाले ‘वैज्ञानिक समाजवादलाई मुख्य लक्ष्य बनाएर संघर्षरत गर्दै आइरहेका छन् ।
पत्रबारे जानकारी आएको र यसबारे अनुसन्धान भइरहेको गोरखा प्रहरीले जनाएको छ । लेटरप्याडमा उल्लेखित नाम विगतमा १० वर्ष सशस्त्र व्रिद्रोह चलाएका विद्रोही नेकपा ९माओवादी०सँग मिल्दोजुल्दो देखिन्छ । जुन पार्टी २०६५ मा शान्ति प्रक्रियामा आएसँगै खुला संसदीय राजनीतमा सक्रिय छ ।