राष्ट्रपति पौडेलद्वारा ५ देशमा गैरआवासीय राजदूत नियुक्त

१७ जेठ, काठमाडौं । राष्ट्रपति रामचन्द्र पौडेलले बुधबार विभिन्न ५ देशमा गैर आवासीय राजदूत नियुक्त गरेका छन् । राष्ट्रपति कार्यालयकी प्रवक्ता शैलजा रेग्मी भट्टराई आज जारी विज्ञप्ति अनुसार राष्ट्रपति पौडेलले फिजी,अर्जेन्टिना, बेलारुस, नर्वे र टर्कीमा गैर आवासीय राजदूत नियुक्त गरेका हुन् । 

संविधानको धारा २८२ को (१) अनुसार अष्ट्रेलियाका आवासीय राजदूत कैलाशराज पौखरेललाई फिजी, ब्राजिलका आवासीय राजदूत निर्मलराज काफ्लेलाई अर्जेन्टिनाको गैरअवासीय र रुसका मिलनराज तुलाधर बेलारुसको गैर आवासीय राजदूतमा नियुक्त भएका हुन् । 

यस्तै, डेनमार्कका डा. रामस्वार्थ रायलाई नर्वे र पाकिस्तानका लागि नेपाली राजदूत तापस अधिकारीलाई टर्कीको गैर आवासीय राजदूतमा नियुक्त गरेको विज्ञप्तिमा उल्लेख छ ।