कोशीकी स्वास्थ्य मन्त्री लिम्बूले दिइन् राजीनामा

१७ जेठ, विराटनगर । जसपाबाट कोशी प्रदेशको स्वास्थ्य मन्त्री रहेकी निर्मला तावा लिम्बूले पदबाट राजीनामा दिएकी छन् । बुधबार बसेको जसपा प्रदेश समितिले सरकारबाट बाहिरिने निर्णय गरेपछि उनले मुख्यमन्त्री हिक्मतकुमार कार्कीलाई राजीनामा बुझाएकी हुन् । उनी पुस २५ गते मन्त्री नियुक्त भएकी थिइन् ।

उनले पहिचान पक्षधरबाट आफ्नो चरित्र हत्या भएको र ज्यानको सुरक्षामा समेत खतरा परेको भन्दै प्रदेशसभा बैठकमै प्रश्न उठाएकी थिइन् । प्रदेशको कोशी नामप्रति असन्तुष्ट जनाउने राई, लिम्बू, किरात लगायत समूदायले कोशी नाम खारेजीको माग गर्दै ३ महिनादेखि विरोध प्रदर्शन गर्दै आइरहेका छन् । 

काेशी प्रदेशमा एमाले नेतृत्वकाे सरकार छ । मुख्यमन्त्री हिक्मत बहादुर कार्की छन् । जसपाले सरकार छाडेसँगै उनकाे कुर्सीकाे दिन गन्ती सुरू भएकाे ठानिएकाे छ ।