भौगोलिक अखण्डताको पक्षमा सरकार दृढ रहेको गृहमन्त्री श्रेष्ठको स्पष्टोक्ति

१७ जेठ, काठमाडौं । उपप्रधान एवम् गृहमन्त्री नारायणकाजी श्रेष्ठले सरकार राष्ट्रिय सार्वभौमिकता, भौगोलिक अखण्डता, राष्ट्रिय स्वाधिनता र स्वाभिमानको पक्षमा दृढ रहेको स्पष्ट पारेकाछन् । 

बुधवार मन्त्रालयमा राष्ट्रिय प्रजातान्त्रिक युवा संगठनले बुझाएको ज्ञापन पत्र ग्रहण गर्दै उनले सरकारले भौगोलिक अखण्डतमा कुनै सम्झौता हुन नसक्ने बताए । उनले नेपालको राष्ट्रियतासँग सम्बन्धित मुद्दाहरुमा सरकारको ध्यानाकर्षण भएको बताए । भारतसँगको सीमा र नक्सा समस्याबारे सरकारले कूटनीतिक माध्यमबाट छलफल सुरु गरेको जानकारी दिए ।

भारतले हालै मात्र आफ्नो नयाँ संसद भवनमा राखिएको नक्सामा नेपालको विराटनगर, लुम्बिनी, कपिलवस्तु लगायत भूभाग समावेश गरेपछि नेपालभित्र र बाहिरबाट विरोध सुरु भएको छ ।

यो विषयमा वार्ता गरेर नक्सा सच्याउने विषयमा सिधा कुरा गर्न भारत भ्रमणमा रहेका प्रधानमन्त्री प्रचण्डलाई सबैले सुझाव दिइरहेका छन् । प्रचण्ड ४ दिनसम्म भारतमा रहनेछन् ।