भारतले आफ्नो नक्सामा नेपाली भूमि समेट्नु अतिक्रमणकारी चिन्तनको उपज : विप्लव

१८ जेठ, काठमाडौं । नेपाल कम्युनिष्ट पार्टी (नकेपा)का महासचिव नेत्रविक्रम चन्द ‘विप्लव’ले भारतीय सरकारले आफ्नो नक्सामा नेपाली भूमि समावेश गरेर सार्वजनिक गर्नु हस्तक्षेपकारी र अतिक्रमणकारी चिन्तनको उपज भएको बताएका छन् । 

भारतका प्रधानमन्त्री नरेन्द्र मोदीले हालै उद्घाटन गरेका भारतको अखण्ड नाम दिइएको उक्त नक्सामा नेपालको लुम्बिनी, विराटनगर, कपिलवस्तु लगायत भूमि सामावेश गरिएको देखाइएको छ । 

महासचिव विप्लवले बुधबार एक प्रेस विज्ञप्ति जारी गर्दै भारतले आफ्नो नक्साबाट नेपाली भूमि तत्काल हटाएर नेपालको सार्वमिकतामाथि हस्तक्षेप नभएको सन्देश दिन माग गरेका छन् । नक्सा घटनाको कडा शब्दमा निन्दा गरेका छन् ।

भारतीय प्रधानमन्त्री मोदीले नेपाली भूमि समेटिएको नक्सा उद्घाटन गरी नेपालमाथि हरेक दृष्टिबाट निरन्तर हस्तक्षेप र भूमिमा अतिक्रमणकारी हर्कत कायमै राखेको स्पष्ट रुपमा साम्राज्यवादी रवैया देखाएको विप्लवको भनाइ छ । ‘भारतले नेपाली भूमिलाई आफनो देशको नक्सामा राख्ने मोदी सरकारको यो कार्य हस्तक्षेपकारी र अतिक्रमणकारी चिन्तनको उपज हो’ विप्लवले भनेका छन् । 

भारतीय संसद भवनको नक्साबाट नेपाली भूमि कपिलवस्तु, विराटनगर र लुम्बिनीलाई तुरुन्त हटाउन राजनीतिक एवं कुटनीतिक पहल अगाडि बढाउन नेपाल सरकारसँग जोडदार गरेका छन् । 

यही बेला प्रधानमन्त्री प्रचण्ड ४ दिने औचारिक भ्रमणका क्रममा बुधबार मात्र नयाँ दिल्ली पुगेका छन् । उनले आजै मात्र समकक्षी नरेन्द्र मोदीसँग भेटवार्ता गर्दैछन् । भेटवार्तामा नक्सा सच्याउन सिधा कुरा राख्न राजनीतिक दल र नागरिक तहबाट व्यापक दबाब बढेको छ ।

विरोधमा नेपालभित्र भारतीय शासकको चर्को विरोध भइरहेको छ ।