दुई छोरालाई विष खुवाएर आमाले गरिन् आत्महत्याको प्रयास

१८ जेठ, काठमाडौं । मकवानपुरको हेटौंडा उपमहानगरपालिका-१५ जाँतेमा एक महिलाले दुई छोरालाई विष खुवाई आफूले पनि विष सेवा गरी आत्महत्याको प्रयास गरेकी छन् । 

बुधबार साँझ जाँतेकी ३६ वर्षीया सोनी पाख्रिनले ७ वर्षीय छोरा अस्किन र १८ महिने छोरा जेनिस वाइबालाई विष खुवाएर आफूले पनि विष सेवन गरेकी हुन् । बेहोस अवस्थामा फेला पारी उद्धार गरी चितवनको भरतपुरस्थित सीएमसी अस्पतालमा पुर्याइएकामा नाबालक छोरा जेनिसको मुत्यु भएको जनाइएको छ । 

झार मार्ने विषादी प्यारा क्वाइट डाइक्लोराइड सेवन गरेको बताइएको छ । उनीहरुलाई हेटौडा अस्पतालमा उपचार संभव नभएपछि राति नै चितवन मेडिकल कलेज (सीएमसी)मा लगिएको थियो । 

आमा सोनी र छोरा अस्किनको अवस्था गम्भीर रहेको अस्पतालले जनाएको छ । दुवै जनाको आईसीयूमा राखेर उपचार भइरहेको छ । विष सेवनको कारण खुलिनसकेको प्रहरीले जनाएको छ ।