नेपालसँगको सीमा समस्या समाधान गर्छाैं : नरेन्द्र मोदी

१८ जेठ, काठमाडौं । भारतीय प्रधानमन्त्री नरेन्द्र मोदीले नेपालसँग रहेको सीमासम्बन्धी समस्याको समाधान चाँडै गर्ने बताएका छन् ।

भारत भ्रमणमा रहेका नेपालका प्रधानमन्त्री पुष्पकमल दाहाल ‘प्रचण्ड’सँग हैदरावाद हाउसमा भएको भेटपछि आयोजित संयुक्त पत्रकार सम्मेलनमा मोदीले दुई देशको सम्बन्धलाई हिमालय जति उचाइ र गंगा जति पवित्र रहेको बताउँदै आगामी दिनमा यसलाई थप उचाइमा पुर्याउने बताए ।  ‘यही भावनाले सबै मुद्दा, चाहे सीमाको होस् वा अरु सबैको समाधान गर्छौं’ मोदीले भने ।

पत्रकार सम्मेलनमा मोदीपछि धारणा राखेका प्रम प्रचण्डले भारतसँग नेपालको सीमासम्बन्धी समस्याबारे कुराकानी भएको र आफूले मोदीबाट समस्या समाधानबारे विश्वस्त जवाफ पाएको बताएका थिए ।

नेपालको सुदूरपश्चिमका दार्चुलाको लिम्पियाधुरा, लिपुलेक र कालापानीमा भारतले अतिक्रमण गरेर सेना तैनाथ गर्दै आइरहेको छ । यो पटक भारतले आप्mनो नयाँ संसद भवनमा ‘अखण्ड भारत’ भनी सार्वजनिक गरिएको नक्सामा नेपालको लुम्बिनी, कपिलवस्तु, विराटनगरलगायत भूभाग समावेश छ । यसविषयमा नेपालभित्र भारत सरकारको विरोधमा सशक्त आवाज उठिरहेको छ ।