भ्रष्टाचार छानबिन आफूबाट सुरु गर्न अख्तियारलाई झलनाथ खनालको चुनौति

१८ जेठ, काठमाडौं । नेकपा (एकीकृत समाजवादी)का नेता झलनाथ खनालले भ्रष्टाचार छानबिनको सुरुवात आफूबाट गर्न अख्तियार दुरुपयोग अुनसन्धान आयोगलाई चुनौति दिएका छन् । 

बिहीबार काठमाडौंमा पत्रकार सम्मेलनमा बोल्दै नेता खनालले आफू कुनैपनि भ्रष्टाचारमा संलग्न नरहेको बताउँदै सरकारले भ्रष्टाचारसम्बन्धी छानबिन र अनुसन्धान अभियान चलाए पहिला आफूबाट सुरु गर्न सुझाए । 

‘नेताहरूको भ्रष्टाचारबारे छानबिन गर्ने हो भने मैबाट सुरु गरौं, यसमा सरकार तयार ? म त हरदम तयार छु’ उनले भने । 

झलनाथ खनाल फाउण्डेशनमार्फत सर्पसम्बन्धी प्रोजेक्टमा बजेट विनियोजन गराई खनालले ७२ करोड रकम भ्रष्टाचार गरेको आरोपप्रति आक्रोशित बनेका खनालले देश भ्रष्टाचारकै कारण गरिब बनेको बताए । आफूसँग रहेको ७० रोपनीमध्ये ५५ रोपनी सिटीभीटीइलाई दिएको पनि जानकारी दिए ।

अर्को प्रसंगमा गुण्डागर्दी चलाउने पूर्वराजाका भरौटेहरुलाई देशभर कुनैपनि गतिविधि गर्न दिन नहुने बताए । मंगलबार काठमाडौंमा आयोजित कार्यक्रममा सहभागी भएका बेला खनालमाथि सन्तोष राजावादी भन्ने युवाहरुले दूर्व्यवहार गरेका थिए ।

दुर्व्यवहारमा संलग्न सन्तोषसहित ९ जनालाई प्रहरीले हिरासतमा राखेर अनुसन्धान गरिरहेको छ ।