पच्चिस वर्षका लागि भारतसँग विद्युत व्यापारको प्रारम्भिक सम्झौता, सम्झाैता नेपालकाे हितमा भएकाे घिसिङकाे तर्क

१७ जेठ, काठमाडौं । नेपाल र भारतबीच दीर्घकालीन (२५ वर्ष) विद्युत व्यापारका लागि प्रारम्भिक सम्झौतामा हस्ताक्षर भएको छ । प्रधानमन्त्री पुष्पकमल दाहाल प्रचण्डको भारत भ्रमणका क्रममा बिहीबार दुई देशका ऊर्जा सचिवस्तरमा दीर्घकालीन विद्युत व्यापार (लङ टर्म पीपीए)का लागि प्रारम्भिक सम्झौता भएको हो ।

प्रधानमन्त्री प्रचण्ड र भारतका प्रधानमन्त्री नरेन्द्र मोदीको समुपस्थितिमा बिहीबार दिल्लीको हैदरावाद हाउसमा नेपालका ऊर्जा सचिव दिनेशकुमार घिमिरे र उनका भारतीय समकक्षी श्रीआलोक कुमारले प्रारम्भिक सम्झौतामा हस्ताक्षर गरेका छन् ।

नेपालले भारतसँग दीर्घकालीन विद्युत् व्यापारबारे अन्तरसरकारी सम्झौता गर्न राखेको प्रस्तावमा भारत सहमत भएको हो । सम्झौताअनुसार भारतसँग नेपालले २५ वर्षका लागि दीर्घकालीन विद्युत व्यापार गर्न सक्नेछ । भारतले १० वर्षभित्र नेपालको १० हजार मेगावाटसम्म बिजुली किन्ने प्रतिबद्धता जनाएको छ । संयुक्त पत्रकार सम्मेलनमा भारतीय प्रधानमन्त्री नरेन्द्र मोदीले भारत र नेपालबीच ‘लंगटर्म पावर ट्रेड एग्रिमेन्ट’ भएको बताएका छन् ।

सम्झौता गर्ने सहमति जनाएको भारत भ्रमणमा प्रधानमन्त्रीको प्रतिनिधिमण्डलमा सहभागी नेपाल विद्युत प्राधिकरणका कार्यकारी निर्देशक कुलमान घिसिङले जानकारी दिए ।

भ्रमण टोलीमा रहेका नेपाल विद्युत प्राधिकरणका कार्यकारी निर्देशक कुलमान घिसिङले हाल भएको प्रारम्भिक सम्झौताले नेपालले भारतसँग उर्जा व्यापारबाट राम्रो लाभ लिन सक्ने बाटो खुलेको बताए । आगामी दिन पूर्ण सम्झौता गर्न बाटो खुलेको पनि उनले बताए । अहिलेको सम्झौता नेपालको हितमा भएको बताए ।