पञ्चेश्वर बहुउद्देश्यीय परियोजनाको डीपीआर तयार पार्न भारत सहमत

१७ जेठ, काठमाडौं । नेपाल र भारतबीच २७ वर्ष पहिला भएका महाकाली पञ्चेश्वर बहुउद्देश्यीय परियोजनाको डीपीआर आगामी ३ महिनाभित्रै टुंगो लगाउने सहमति भएको छ ।

भारतकाे ४ दिने भ्रमणका क्रममा बिहीबार हैदराबाद हाउसमा भारतीय प्रधानमन्त्री नरेन्द्र मोदीसँगको भेटपछि आयोजित संयुक्त पत्रकार सम्मेलनमा प्रधानमन्त्री पुष्पकमल दाहाल ‘प्रचण्ड’ले भारत ३ महिनाभित्र पञ्चेश्वरको डीपीआरको टुंगो लगाएर एक वर्षभित्र लगानीको प्रारुप टुंग्याउने सहमति भएको जानकारी दिए ।

दुई देशबीच हुने लाभको वितरण भने पानीको उपभोगका आधारमा हुने भएको छ । महाकाली सन्धि भएको २७ वर्षसम्म पनि पञ्चरेश्वरको निर्माण सुरु हुन सकेको छैन । परियोजना बनाउन नेपालले पटकपटक आग्रह गर्दै आएपनि भारतले डीपीआर तयारीको काम थाल्न समेत बेवास्ता गर्दै आइरहेको छ । 

सन्धिबमोजिम नेपाल–भारतको सीमा नदी महाकालीलाई नहर बनाएर भारतले लगिरहेको रहेको छ । पञ्चेश्वर बहुउद्देश्यीय परियोजना सम्पन्न भएको खण्डमा नेपाललाई राम्रो मात्रामा आर्थिक लाभ हुने विश्वास छ ।

२९ माघ २०५२ मा तत्कालीन प्रधानमन्त्री शेरबहादुर देउवा र भारतीय समकक्षी नरसिंह रावले महाकाली सन्धिमा हस्ताक्षर गरेका थिए । सन्धिमा ६ महिनाभित्र पञ्चेश्वर बहुउद्देश्यीय परियोजनाको विस्तृत परियोजना प्रतिवेदन (डीपीआर) तयार पार्ने भनिएको छ । सन्धिले नेपालीलाई अमेरिकी डलरमा आम्दानी हुने त्यतिबेला एमालेका नेता (हाल एमाले अध्यक्ष) केपी शर्माले भाषण गर्दै हिँडेका थिए ।

महाकाली सन्धिलाई देशभित्रका एकथरी जनमत राष्ट्रघाती मान्दछ ।