ईपीजी प्रतिवेदन, अग्निपथ र अखण्ड भारतको नक्साबारे प्रधानमन्त्रीबीच छलफल भएनः विदेश सचिव क्वात्रा

१८ जेठ, काठमाडौं । भारतीय विदेश सचिव विनयमोहन क्वात्राले नेपाल र भारतका प्रधानमन्त्रीबीच नेपाल–भारत प्रबुद्ध समूह (ईपीजी) को प्रतिवेदनलगायतका विषयमा चर्चा नभएको बताएका छन् ।  उनले गोर्खा भर्ती र भारतीय संसदमा राखिएको अखण्ड भारतको नक्सामा नेपालको कपिलवस्तु अंकित गरिएको विषयमा छलफल नभएको बताएका छन् । 

प्रधानमन्त्री पुष्पकमल दाहाल प्रचण्ड र भारतीय समकक्षी नरेन्द्र मोदीबीच भएको प्रतिनिधिमण्डल स्तरीय भेटवार्तापछि आयोजित पत्रकार सम्मेलनमा विदेश सचिव क्वात्राले व्यक्तिगत स्तरमा र त्यसपछि द्विपक्षीय प्रतिनिधिमण्डलबीच भएको बैठकमा ती विषयहरू नउठेको बताएका हुन् ।

प्रधानमन्त्रीहरूको संयुक्त पत्रकार सम्मेलनपछि विदेश सचिव क्वात्राले पत्रकार सम्मेलन गरेका थिए । पत्रकारहरूले सोधेको प्रश्नमा क्वात्राले आफूलाई जानकारीमा भए अनुसार अग्नि पथमा गोर्खा भर्ती, ईपीजी र शान्ति तथा मैत्री सन्धिको विषयमा दुई प्रधानमन्त्रीहरूबीच द्विपक्षीय र प्रतिनिधिमण्डल स्तरीय बैठकमा कुरा नभएको बताए । उनले भारतको संसदमा भर्खरै राखिएको ‘अखण्ड भारत’को माेडलको बारेमा पनि दुई प्रधानमन्त्री बीचमा छलफल नभएको बताए ।