पार्टी पंक्तिमा निराश बढ्याे, आवश्यक परे जिम्मेवारी छाड्न तयार छु : महामन्त्री थापा

१८ जेठ, काठमाडौं । नेपाली कांग्रेसका महामन्त्री गगनकुमार थापाले पार्टीलाई सक्षम बनाउन पार्टीभित्रका सबै गुटहरुलाई भत्काउनुपर्ने बताएका छन् । गुट भत्काउने क्रममा आवश्यक परे आफू जस्ताेसुकै जिम्मेवारी छाड्न तयार रहेकाे बताए ।

बिहीबार काठमाडौंमा आयोजित एक कार्यक्रममा महामन्त्री थापाले कांग्रेस पुनर्निर्माणका निम्ति सबै गुटहरुलाई भत्काउनुको विकल्प नरहेको बताए । उनले पार्टीभित्र जम्मा दुई वटा गुटमा हुनुपर्ने बताए । 

‘नेपाली कांग्रेस पार्टीभित्र सबै पक्षलाई सुधार्ने हो भने कांग्रेसभित्र हामीले भएको गुट सबै भत्काउनुपर्छ’ महामन्त्री थाले भने, ‘जम्मा कांग्रेसमा दुईवटा गुट छ भन्ने बनाऔं । एउटा गुट कांग्रेसमा परिवर्तन चाहने गुट र अर्को उटा गुट परिवर्तन रोक्ने मात्र बनाउनुपर्छ । यो दाई, त्यो दाई भन्न छाड्नु पर्छ ।’

पार्टीभित्रक गुट र बेथिति हटाउन सकेमात्र देशलाई कुशासन, बेथिति, भ्रष्टाचार हटाउन सकिने बताए । 
गुट नभत्काउने र दाई साइनो कायमै राख्ने हो भने कांग्रेस झनै कमजोर र बेथिति मौलाउँछ’ उनले भने ।

पार्टीभित्रका गुट र नेतृत्वको व्यवहार देखेर कार्यकर्तामा निराश छाएको बताउँदै आवश्यक परे पार्टी र जनताको हितका लागि आफू महामन्त्रीबाट हटन तयार रहेको बताए । 

‘पार्टीको महामन्त्री भएर मैले यो भनिराख्दा पार्टीको सभापति यो भन्न तयार हुनुहुन्छ कि हुनुहुन्न भन्ने प्रश्न पनि आउँछ । त्यसमा उहाँ तयार हुनुहुन्छ ?’ उनले प्रश्न गरे ।

पार्टी पंक्तिको तल्लो तहमा निराश छाउने मुख्य कारण चुनावमा पार्टी गठबन्धन जानु नै रहेको उनको भनाइ थियो ।