राष्ट्रिय दूग्ध विकास बोर्ड खारेज हुने कुराले आत्तिनु पर्दैन: मन्त्री भुसाल

१८ जेठ काठमाडौं । कृषि तथा पशुपंक्षी विकासमन्त्री डा. वेदुराम भुसालले राष्ट्रिय दूग्ध विकास बोर्ड खोरज हुने कुराले आत्तिहाल्नुपर्ने अवस्था नरहेको बताएका छन् । 

बिहीबार राष्ट्रिय दूग्ध विकास बोर्डले विश्व दूध दिवसको अवसरमा ललितपुरमा आयोजना गरेको एक कार्यक्रममा बोल्दै मन्त्री भुसालले यस्तो बताएका हुन् । 

बोर्ड खारेजको विषयमा सरोकारवाला निकायहरुबीच छलफल र सहकार्यमार्फत नै प्रक्रिया अगाडि बढाउने बताए । “दूग्ध विकास बोर्ड खारेज गर्ने सरकारको तयारी भएपनि बोर्डलाई पुनःसंरचना गर्ने वा बोर्ड नै कायम राखेर मन्त्रालयले काम गर्ने विषयमा छलफल गरेर टुंग्याउनेछौँ,” उनले भने । 

सार्वजनिक संस्थानहरूले संस्था व्यवस्थापन खर्चका लागि आफ्नै स्रोत बनाउनुपर्ने आवश्यकता भएपनि त्यस्तो नभएको कारण खारेज गर्नुपर्ने अवस्था आएको बताए । उनले संस्थान भएको औचित्य पुष्टि गर्न नसक्दा निर्णय गर्ने निकाय र सिफारिस गर्नेहरुले खारेज गर्न लागेको बताए । 

‘अहिलेको आवश्यकता बोर्ड खारेजी नै हो वा पुनःसंरचनामा जाने तथा अन्य उपाय खोज्ने विषयमा छलफल गर्न सकिन्छ । खारेज हुने कुराले आत्तिहाल्नुपर्ने अवस्था छैन, उनले भने । बोर्ड खारेज भएपनि कर्मचारी व्यवस्थापन गर्ने सरकारको दायित्व भएको बताए ।