नेपालगन्ज-रूपैडिहाकाे एकीकृत जाँचचौकी डेढ दशकपछि सञ्चालन

१९ जेठ, काठमाडौं । बाँकेस्थित नेपाल र भारतबीचको सीमा नाका नेपालगन्ज-रूपैडियाकाे एकीकृत जाँच चौकी (आईसीपी) १८ वर्षपछि संचालनमा आएको छ । निर्माण भएको  १८ वर्षपछि आईसीपी सञ्चालनमा आएको हो । 
भारत भ्रमणमा रहेका प्रधानमन्त्री पुष्पकमल दाहाल ‘प्रचण्ड’ र भारतीय प्रधानमन्त्री नरेन्द्र मोदीले आईसीपीको बिहीबार नयाँ दिल्लीबाट संयुक्त रूपमा भर्चुअल माध्यमबाट उद्घाटन गरेका थिए । यो चौकीबाट शुक्रबारबाट आयात–निर्यात सुरु भएको छ । आईसीपी सञ्चालनको खुशीयालीमा पन्चैबाजा बजाइएको थियो ।

त्यसकाे भाेलिपल्ट शुक्रबार संघीय सांसद धवलशमशेर राणा, बाँकेका प्रमुख जिल्ला अधिकारी विपिन आचार्य, नेपाल उद्योग वाणिज्य महासंघका सदस्य अब्दुल वाहिद मन्सुरीलगायत सुरक्षा निकायका प्रमुखले नेपाल र भारतको झण्डा फहराउँदै नेपालतर्फबाट प्रालिले जडीबुटी बाेकेकाे ट्रक भारततर्फ पठाइएका थिए । 

यस्तै, भारततर्फबाट बहराइच जिल्लाका प्रमुख जिल्ला अधिकारी (डीएम) मोनिका रानी, प्रहरी प्रमुख एसपी प्रशान्त बर्मालगायतले नेपाल र भारतको झण्डा हल्लाएर भारतबाट नेपालमा पेट्रोलियम र एलपी ग्यास बोकेको ट्यांकर तथा प्लाईवुड लाेड भएकाे ट्रकलाई नेपालतर्फ पठाएका थिए । ट्रकमा नेपाल र भारतको संयुक्त रुपमा झण्डा अंकित ब्यानर राखिएको थियो ।

 नेपाल र भारतबीच सन् २००५ मा आईसीपी निर्माण गर्ने सम्झौता भएको थियो। भारतीय केन्द्रीय गृहमन्त्री राजनाथ सिंहलेभारततर्फको आईसीपी शिलान्यास गरेका थिए । दुई वर्षपछि अर्थात् २००७ कात्तिकमा मात्र नेपालतर्फ भूमिपूजन गरिएको थियो ।

आईसीपीमा भन्सार जाँचपासका लागि आवश्यक पर्ने भन्सार कार्यालय, बैंक, पशु क्वारेन्टिन, प्लान्ट क्वारेन्टिन, खाद्य प्रविधि तथा गुण नियन्त्रण कार्यालय, नेपाल प्रहरी र सशस्त्र प्रहरीको ब्यारेकलगायत कर्मचारीको आवास गृहको निर्माण गरिएको छ।  भारत सरकारले यसअघि नै विराटनगर र वीरगन्जमा आईसीपी निर्माण गरी नेपाल सरकारलाई हस्तान्तरण गरेर सञ्चालनमा छन् । 

प्रधानमन्त्री प्रचण्ड ४ दिने भ्रमणका लागि बिहीबार नयाँ दिल्ली पुगेका थिए । उनी शनिबार नेपाल फर्किने तालिका छ ।