विपन्न वर्गका बिरामीको निःशुल्क नगर्ने अस्पताललाई कारबाही गर्ने स्वास्थ्यमन्त्रीको चेतावनी

१९ जेठ, काठमाडौं । स्वास्थ्य तथा जनसंख्यामन्त्री मोहनबहादुर बस्नेतले विपन्न तथा आर्थिक अवस्था कमजोर भएका विपन्न वर्गका बिरामीको निःशुल्क उपचार नगर्ने अस्पतालहरुलाई कारबाही गर्ने चेतावनी दिएका छन् ।

शुक्रबार शहीद गंगालाल राष्ट्रिय हृदय केन्द्र र मेडिकेयर हस्पिटलको अनुगमन गर्दै मन्त्री बस्नेतले नियममोजिम विपन्न नागरिकलाई निःशुल्क उपचार गरेको विवरण मागेका छन् । अस्पताल सञ्चालनको स्वीकृति लिँदा गरेको सम्झौताअनुरुप १० प्रतिशत निःशुल्क उपचार गर्न निर्देशन दिए ।

 ‘जसले सम्झौता अनुसार सेवा दिएको छैन, कानूनी परिधिभित्र रहेर हामी कारबाही शुरु गर्छौं’ उनले भने । उनले मन्त्री, सांसद वा नेताहले सिफारिस गर्दा बेड पाउने, नभए नपाउने अवस्थाको अन्त्य गर्ने बताए । बेडको विवरण अस्प्तालले वेभसाइटमा राख्न समेत निर्देशन दिए । 

काठमाडौंका अस्पतालहरुले लक्षित वा विपन्न वर्गका बिरामीलाई निःशुल्क तथा स्वास्थ्यसम्बन्धी छुट नदिएको विवरण प्राप्त भएको भन्दै काठमाडौं महानगरका मेयर बालेन साहले स्वास्थ्यमन्त्री बस्नेतसँग भेट गरेर ७ दिनभित्र कारवाहीको दायरामा ल्याउन ध्यानाकर्षण गराएका थिए ।