शल्यक्रियाका क्रममा गर्भवती र शिशुको ज्यान गयो

१९ जेठ, काठमाडौं । मुगुमा बच्चा जन्माउन नसकेकी एक गर्भवतीको अपरेशन गर्ने क्रममा आमा र शिशु दुवैको ज्यान गएको छ । छायाँनाथ रारा नगरपालिका–१० झाकोटकी ३९ हप्ताकी ३० वर्षीया राञ्जु नेपालीले सामान्य अवस्थामा बच्चा जन्माउन नसकेपछि मुगु जिल्ला अस्पतालमा शल्यक्रियाका क्रममा गर्भवती र गर्भमा रहेकाे बच्चा दुवै जनाकाे मृत्यु भएको अस्पतालले जनाएको छ । 

घरमै व्यथाले च्यापेर गाह्रो भएपछि बिहीबार अस्पताल पुर्याइएको थियो । अस्पतालमा पनि सामान्य अवस्थामा बच्चा जन्मिन नसक्ने देखिएपछि चिकित्सकहरुले पतिको अनुमतिमा शल्पक्रिया (अपरेशन) गरेका थिए । अपरेशनका क्रममा गर्भवती र बच्चाको आज बिहान ९ बजे मृत्यु भएको हो । 

मृत्युपछि अस्पतालका चिकित्सक डा. कमल ढुंगानाले एक प्रेस विज्ञप्ति जारी गर्दै अपरेशका लागि ढाडबाट लठ्याउने औषधि दिँदा गर्भवती एक्कासि बेहोस् नाडी र मुटु चाल बन्द भएको र केहीबेरमै श्वासप्रश्वास बन्द हुन पुगेको जनाएका छन् । 

ढुंगनाले गर्भवतीको पाठेघारको मुख ३ सीमीभन्दा नखुलेको घर बच्चा र आमाको स्वास्थ्य खतरालाई ख्याल राखेर गर्भवती र उनकी श्रीमानको अनुमतिमै अपरेशनमा लगेको विज्ञप्तिमा उल्ल्ेख गरेका छन् । बच्चाको चाल समेत कम हुन थालेपछि अन्य अस्पतालमा रिफर गर्दा बाटैमा ज्यान जान सक्ने खतरा बढेपछि अनुमति लिएर अपरेशनमा लगेको उनको भनाइ छ । 

बेहोस भएपछि जीवन बचाउन तत्कालल गरिने कार्डियो पल्मोनरी रेस्सिटेसन प्रयोगबाट २ घण्टासम्म कृत्रिम श्वासप्रश्वासद्वारा रगतमा अक्सिजन पठाउँदा समेत उपाय नलागेको विज्ञप्तिमा उल्लेख छ ।

बचाउने कोशिस हुँदाहुँदै आमा र बच्चालाई बचाउन नसकेको उल्लेख गर्दै उनले मृत्यु दुःख व्यक्त गरेका छन् ।