एमाले सचिवलय बैठकः उपाध्यक्षहरूलाई ३२ विभागको जिम्मेवारी, सचिवहरू बने प्रदेश इन्चार्ज

१९ जेठ, काठमाडौं । नेकपा (एमाले)को आज बसेको सचिवालयको बैठक पार्टीका विभागहरुमा नेतृत्वका ेटुंगो लगाएको छ । बैठकले वरिष्ठ उपाध्यक्षसहित ७ जना उपाध्यक्षलाई पार्टीका ३३ वटा विभागको संयोजन गर्नेगरी जिम्मेवारी दिएको छ ।

योजना र नीतिसँग जोडिएका विषयको संयोजन गर्ने जिम्मा वरिष्ठ उपाध्यक्ष ईश्वर पोखरेललाई दिइएको छ । पूर्वाधार र विकासमा सुरेन्द्र पाण्डे, कृषि तथा उद्यमशीलतामा रामबहादुर थापा, सामाजिक विकासमा अष्टलक्ष्मी शाक्य, मानवस्रोतमा युवराज ज्ञवाली, सुशासन विभाग प्रमुखमा सुवास नेम्वाङ, प्रशासनमा विष्णु पौडेललाई तोकिएको छ । एकै जनालाई विषय मिल्ने एकभन्दा बढी विभागको जिम्मेवारी दिने गरी निर्णय लिइएको हो ।

यस्तै, सचिवहरुलाई प्रदेश इन्चार्जको जिम्मेवारी दिइएको छ । कोशीमा रघुवीर महासेठ, मधेसमा योगेश भट्टराई, गण्डकीमा गोकर्ण विष्ट, लुम्बिनी प्रदेशको इञ्चार्जमा पद्मा अर्याल, कर्णाली इन्चार्जमा लेखराज भट्ट र सुदूरपश्चिम प्रदेशको इन्चार्जमा सचिव छविलाल विश्वकर्मा तोकिएका छन् ।

बाग्मती प्रदेश भने केन्द्रीय कार्यालयले नै संयोजन गर्ने गरी निर्णय लिइएको उपमहासचिव प्रदीप ज्ञवालीले जानकारी दिएका छन् । केन्द्रीय सदस्यहरुलाई पालिकाको जिम्मेवारी दिइएको छ ।

बैठकले राष्ट्रपति रामचन्द्र पौडेलबाट प्रमाणिकरण भएको नागरिकता विधेयक र रेशम चौधरीको आममाफी स्वीकृत अस्वीकार गर्ने निर्णय गरेको छ । विधेयक प्रमाणिकरण र आममाफीले संविधानको उल्लंघन भएको निष्कर्ष निकालेको छ ।