दरबार हत्याकाण्ड छानबिन गर्न गृहमन्त्रीलाई निवेदन

१९ जेठ, काठमाडौं । नेपाल समाजवादी मोर्चाका संयोजक सफल भनिने युवराज पौडेल सफलले २०५८ जेठ १९ गते भएको नारायणहिटी दरबार हत्याकाण्डको निष्पक्ष छानबिन गर्न उपप्रधान एवं गृहमन्त्री नारायणकाजी श्रेष्ठलाई निदेवन दिएका छन् ।

तत्काल राजा वीरेन्द्र वीर विक्रम शाह र रानी ऐश्वर्य राज्य लक्ष्मी शाहसहित ६ जनाको निर्मम हत्या भएको घटनाको सत्यतथ्य बाहिर नआउँदा नेपालको छवि अन्तर्राष्ट्रियरुपमा समेत धुमिल भएको जनाउँदै यथाशक्य छिटो दरबार हत्याकाण्डको छानबिन एवम् अनुसन्धान गर्न सरकारको ध्यानाकर्षण गराउन चाहेको उनले बताएका छन् ।

प्रधानमन्त्री प्रचण्डले संसदमा समेत दरबार हत्याकाण्ड, गौर हत्याकाण्डलगायत ठूला र भयानक हत्याकाण्डको छानबिन हुनुपर्ने बताएका थिए । हयाकाण्डको छानबिन र यथार्थ बाहिर नआउँदा जनताले सही कुरा थाहा पाउन नसकेको र यसबाट हत्याकाण्ड झनै रहस्यमय बन्दै गएको उनको तर्क थियो ।