मलाई गाली गरेर पार्टी बन्दैनः सभापति देउवा

२० जेठ, काठमाडौं । नेपाली कांग्रेसका सभापति शेरबहादुर देउवाले आफू पार्टी राजनीतिको अन्तिम कार्यकालमा रहेको बताएका छन् । उनले पार्टीमा अब आफू सभापति नबन्ने भन्दै कुनै एक व्यक्तिलाई मात्र गाली गरेर पार्टी ठूलो नबन्ने बताएका छन् । कांग्रेस जिल्ला कार्यसमिति ललितपुरको प्रथम जिल्ला सम्मेलनमा शनिबार उनले पार्टी ठूलो बनाउन जनतामा जानुपर्ने बताए ।

आफू सभापति पदमा रहेर काम गर्ने कार्यकाल यो नै अन्तिम रहेको भन्दै उनले अब युवापुस्ताको पालो भएको उल्लेख गरे । पार्टीलाई बलियो बनाउन कसैले पनि नरोकेको उनले स्पष्ट पारे । पार्टी बलियो बनाउन जनताको काँधमा काँध मिलाइ जनसम्पर्क विस्तार गर्नुपर्नेमा उनले जोड दिए । आफूले कांग्रेसलाई अहिले देशकै ठूलो पार्टी बनाएको पनि देउवाले दावी गरे । 

सभापति देउवाले नेपाली कांग्रेस नेपालको राजनीतिमा सबैभन्दा ठूूलो पार्टी भएको कुन सत्य कुरा भएको भन्दै गाली गरेर मात्र केही नहुने बताए । उनले सधैँ हारेको नेविसंघ जितेको छ अहिले सबै ठाउँमा जितेको भन्दै आफूले सानो पार्टीलाई ठूलो पार्टी बनाएको दावी गरे । अब यसलाई अघि बढाउन  अझ लियो ढंगले लाग्नुपर्नेमा जोड दिए । 

उनले भने, ‘गाली गरेर केही हुनेवाला छैन । काम गर्नुस् न, पार्टी ठूलो बनाउनुस् । बलियो बनाउनुस् । विरोध गरेर पार्टी बन्नेवाला छैन । पार्टी बनाउनलाई जनताको काँधमा काँध र जनसम्पर्क नै हो । जनतामा जानुपर्छ । जनतामा जाने हो । गाली गरेर कहाँ पार्टी बन्छ ? लडाइँ गर्ने हो ? अप्ठ्यारोमा गयो भने के गर्ने ? अहिले पार्टीलाई मजबुत बनाउने हो । मैले पार्टी ठूलो बनाइहालेँ । अब त मैले सहयोग गर्ने हो, पार्टी सभापति हुने होइन । एकजनालाई गाली गरेर पार्टी बलियो हुँदैन । सबै एक भएर गए पार्टी बलियो हुन्छ ।’