एमाले, रास्वपा र राप्रपाले गरे संसद बैठक अवरुद्ध

२१ जेठ, काठमाडौं । प्रमुख प्रतिपक्षी दल नेकपा (एमाले), प्रतिपक्षी राप्रपा र रास्वपाले आइतबार प्रतिनिधिसभाको बैठक अवरुद्ध गरेका छन् ।

बैठकमा एमालेका प्रमुख सचेतक पदम गिरी र रास्वपाका प्रमुख सचेतक सन्तोष परियार तथा राप्रपा संसदीय दलका नेता राजेन्द्र लिङदेनले राष्ट्रपति रामच्न्र पौडेलबाट हालै भएका नागरिकता विधेयक प्रमारणिकरण र हालै भएको भारतको औपचारिक भ्रमणका क्रममा प्रधानमन्त्री प्रचण्डले नेपाली भूमि लिपुलेक भारतलाई छाड्ने गरी पूर्वी सीमातर्फ बंगलादेशसँगको व्यापारिक नाका खुलाउन भारतलाई खुशी पार्ने काम गरेर राष्ट्र हितविपरीत कार्य गरेको भन्दै संसद अवरुद्ध गरेका हुन् । रेशम चौधरीलाई आममाफी दिने सरकारको निर्णयले पनि विरोध गरेका छन् ।

यस विषयमा प्रधानमन्त्रीले संसदमा माफी नमागेसम्म संसद चल्न नदिने उनीहरुले अडान लिएका छन् । संसद बैठकमा प्रतिपक्षी दलका सांसदहरुले कुर्सीबाट उठेर नाराबाजी गरिरहेका छन् । आफुहरुले उठाएका विषयमा प्रधानमन्त्री प्रचण्डको जवाफ नआएसम्म संसद बैठक अवरुद्ध क्रमलाई जारी नै राख्ने अडान लिएका छन् ।

उनीहरूले ‘देश बेच्न पाइँदैन, आमममाफी दिन पाइँदैन, नागरिकता विधेयक खारेज गर’ जस्ता नारा लगाएका छन् ।