प्रतिनिधिसभा बैठक एक घण्टाका लागि स्थगित

२१ जेठ, काठमाडौं । आइतबारको प्रतिनिधिसभाको बैठक एक घण्टका लागि स्थगित गरिएको छ । प्रमुख प्रतिपक्षी दल नेकपा (एमाले), प्रतिपक्षी रास्वपा र राप्रपाका सांसदहरुले राष्ट्रपति रामचन्द्र पौडेलबाट हालै नागरिकता विधेयक प्रमाणिकरण, आमामाफीप्रति असहमित जनाउँदै बैठक अवराेध गरेका छन् ।

साथै प्रधानमन्त्री पुष्पकमल दाहाल ‘प्रचण्ड’ले भारतको ४ दिने औपचारिक भ्रमणका क्रममा नेपाली भूमि लिपुलेक, कालापानी, लिम्पियाधुरा लगायत भूमि भारतलाई छाड्ने र भारतसँगको सीमा समस्या समाधानको विकल्प रुपमा पूर्वी सीमनातर्फ बंगलादेशसँग व्यापार विस्तारका लागि भारतसँग सम्झौता गर्ने जस्ता विषयमा संसद बैठकमा जानकारी दिइनुपर्ने भन्दै बैठक अवरुद्ध पारेका छन् ।

प्रतिपक्षी दलका सांसदहरु कुर्सीबाट उठेर नाराबाजी र विरोध जारी राखेपछि सभामुख देवराज घिमिरेले बैठक  एक घण्टा स्थगित हुने जानकारी दिएका छन् ।

प्रतिपक्षी सांसदहरुले राष्ट्रपति र प्रधानमन्त्रीविरुद्ध चर्का नाराबानी गरे । बैठक स्थगित गरेर सभामुख घिमिरेले सर्वदलीय बैठक राखेर संसद बैठक चलाउनेबारे छलफल गरिरहेका छन् ।