नक्कली भुटानी शरणार्थी मुद्दामा थुनछेक बहस सुरु

२१ जेठ, काठमाडौं । नक्कली भुटानी शरणार्थी प्रकरणमा पूर्वगृहमन्त्री एवं नेपाली कांग्रेसका नेता बालकृष्ण खाण, पूर्वउपप्रधानमन्त्री एवं एमाले सांसद टोपबहादुर रायमाझी लगायत ३० जनालाई संगठित अपराध, ठगी, राज्यविरुद्ध कसुर र सरकारी लिखत कीर्तेसहित ४ कसुरमा जिल्ला सरकारी वकिलको कार्यालय काठमाडौंले जेठ १० मा दर्ता गराएको मुद्दामा थुनछेक बहस सुरु भएको छ । 

न्यायाधीश प्रेमप्रसाद न्यौपानको इजलासमा केहीबेर अघिमात्र बहस सुरु भएको हो । बहसमा उपस्थित गराउन प्रहरीले पक्राउ परेका १८ जनलाई इजलासमा उपस्थित गराएको छ । बहसका समयमा संचारकर्मीलाई इजलासमा जान बन्देज लगाइएको छ । 

मुद्दाका वादी पक्षबाट अहिले सरकारी वकिलले बहस जारी राखेका छन् । प्रकरणमा तानिएका ३० जना प्रतिवादीमध्ये खाण, रायमाझी, उनका छोरा सन्दीप रायमाझीसहित १८ जनामात्र पक्राउ परेका छन् । १२ जना फरार छन् । उनीहरुलाई इन्टरपोलमार्फ खोजीका लागि सूचना जारी गर्ने तयारीमा प्रहरी रहेको छ ।

उनीहरुविरुद्ध २८ करोड ७४ लाख ७४ हजार पाँच सय रुपैयाँ बिगो मागदाबी गरिएको छ । थुनछेक बहस यो साताभर चल्ने अनुमान गरिएको छ । बहस सकिएपछि मुद्दा पुर्पक्षका लागि जेल चलान गर्ने कि धरौटी वा साधारण तारेख छाड्ने भन्ने आदेश हुनेछ ।

प्रहरीमा सबैले अपराध स्वीकार गरेपनि अदालतमा न्यायाधीश समक्ष दिएको बयानमा भने अस्वीकार गरेको जनाइएको छ । तर घटनाको अनुुसन्धानका क्रममा बरामद सबुद र फेला पारिएका प्रमाणहरुले अभियुक्तहरु दोषी ठहर हुने पर्याप्त आधार पुगेको वादी पक्षको दाबी छ ।