राष्ट्रियसभा बैठकः पूूर्वसांसद पाण्डेको निधनमा शोक प्रस्ताव पारित, अर्को बैठक सोमबार

२१ जेठ, काठमाडौं । आइतबार बसेको राष्ट्रियसभाको बैठकमा पूर्वसांसद एवं नेपाली कांग्रेसकी नेतृ मिना पाण्डेको निधनमा शोक प्रस्ताव पारित भएको छ ।

आजै बसेको पहिलो बैठकमा प्रतिपक्षी नेकपा (एमाले)ले राष्ट्रपति रामचन्द्र पौडेलबाट निष्क्रिय नागरिकता विधेयक प्रमाणिकरण गरेर असंवैधानिक काम भएको र प्रधानमन्त्री प्रचण्डले भारत भ्रमणका क्रममा विवादास्पद अभिव्यक्ति दिएको भन्दै यसबारे बैठकमा प्रधानमन्त्री प्रचण्डले जवाफ दिनुपर्ने माग राखेर अवरुद्ध गरेको थियो । 

त्यसपछि अध्यक्ष गणेशप्रसाद तिमल्सिनाले बैठक २९ मिनेटका लागि स्थगित गरेका थिए । पछि दोस्रो पटक बसेको बैठकबाट निधनको शोकमा एक मिनेट मौनधारण गरी शोक प्रस्ताव पारित गरिएकाे हाे ।

दोस्रो बैठक अन्य कार्यसूचीमा प्रवेश नै नगरी शोक प्रस्ताव पारित गरेर भोलि सोमबार दिउँसो १ बजे बस्ने गरी बैठक स्थगित गरिएको अध्यक्ष तिमल्सिनाले जानकारी दिए ।