क्यानले भोली सन्दीप लामिछानेलाई दक्षिण अफ्रिका पठाउने

२१ जेठ, काठमाडौं । नेपाली राष्ट्रिय पुरुष क्रिकेट टोलीका महत्वपूर्ण सदस्य सन्दीप लामिछानेलाई नेपाल क्रिकेट संघ क्यानले अफ्रिका पठाउने भएको छ ।  बलात्कारको आरोप लागेका लामिछानेको पेसी जिल्ला अदालत काठमाडौंको असार २९ गतेका लागि सारेपछि क्यानले लामिछानेलाई सोमबार बेलुकी दक्षिण अफ्रिका पठाउन लागेको हो ।

आईसीसी एकदिवसीय विश्वकप छनोटको अन्तिम तयारीका लागि नेपाली टोली हाल दक्षिण अफ्रीकामा रहेको छ । यही बिचमा  लामिछानेको मुद्दाको पेसी परेको भन्दै क्यानले उनलाई टोलीसँगै पठाएको थिएन ।  

यस्तै क्यानका अनुसार भिसा समस्याका कारण जान रोकिएका नेपाली टोलीका मुख्य प्रशिक्षक मोन्टी देसाई पनि केही दिनमा नै दक्षिण अफ्रीका जाने भएका छन् । । देसाईको भिसाको काम अन्तिम तिर पुगेकाले केही दिनमा नै उनी दक्षिण अफ्रीकामा रहेको नेपाली टोलीमा सामेल हुने क्यानले जनाएको छ । 

दक्षिण अफ्रीकामा नेपालले नेदरल्यान्ड्स र स्कटल्यान्डसँग अभ्यास खेल खेल्नेछ । नेपालले जेठ २५ गते बिहिबार पहिलो खेल स्कटल्यान्डसँग रहेको छ । जेठ २७ गते शनिबार नेदरल्यान्ड्ससँगको दोस्रो अभ्यास खेल रहेको छ । अभ्यास खेल ५० ओभरको रहने छ । नेपाली टोली गत मंगलबार दक्षिण अफ्रीका प्रस्थान गरेको थियो ।