प्रधानमन्त्रीको भारत भ्रमण ज्यादै फितलो र मर्यादाहीन भयोः ओली

२२ जेठ, काठमाडौं । नेकपा एमालेका अध्यक्ष केपी शर्मा ओलीले प्रधानमन्त्री पुष्पकमल दाहाल प्रचण्डको भारत भ्रमणका क्रममा प्रोटोकोलको उल्लंघन भएको बताएका छन् । उनले भारतीय प्रधानमन्त्री नरेन्द्र मोदीसँगको भेटमा छोरी गंगा दाहाललाई सहभागी गराइएकोप्रति प्रश्न उठाउँदै प्रोटोकला नमिलेको बताएका छन् । 

सोमबार संसद्मा बोल्दै ओलीले भने, प्रोटोकल भएन । तरिका पनि मिलेन । को कता छ थाहा छैन । प्रधानमन्त्रीको छेउमा छोरी राख्नुभएको छ । परराष्ट्रमन्त्री छैन, परराष्ट्र सचिव छैन, चिफ अफ प्रोटोकल छैन । परिवारको सदस्य राख्नुभएको छ । उनले प्रधानमन्त्रीले उच्च सरकारी अधिकारीको सट्टा आफ्नो परिवारको सदस्यलाई सहभागी गराइएको बताए ।  

ओलीले प्रधानमन्त्रीको भारत भ्रमणमा प्रोटोकल र देशको मर्यादा उल्लंघन भएको बताए । प्रधानमन्त्रीको भारत भ्रमण फितलो रहेको भन्दै उनले आलोचना गरे । प्रधानमन्त्री प्रचण्डले भारतीय अधिकारीहरूसँगको भेटका क्रममा परराष्ट्रमन्त्रीलगायतका मन्त्रीहरूलाई सँगै नराखी प्रमुख स्वकीय सचिव छोरीलाई राखेको भन्दै ओलीले आलोचना गरेका हुन् ।

’उहाँले परिवारको सदस्य राख्नुभयो । परराष्ट्रमन्त्री कहाँ छन्, अर्थमन्त्री कहाँ छन् ? अरु मन्त्रीहरू कहाँ छन् ? फर्स्ट लेडी भनेको स्पउस (श्रीमान÷श्रीमति) नै हो । परिवारका अन्य सदस्य हैनन् । प्रधानमन्त्रीले मर्यादा राख्नुभएन । प्रोटोकल मिलेन,’ एमाले अध्यक्ष ओलीले भने । प्रधानमन्त्री प्रचण्डले भारत भ्रमणका क्रममा कालापानी, लिपुलेक र लिम्पियाधुराको सट्टा बंगलादेश पुग्ने बाटोसँग साट्नुपर्ने भनेको भन्दै ओलीले आलोचना गरेका छन् ।