अनलाइन माध्यमबाट यौन दुर्व्यवहार गरेको आरोपमा युवक पक्राउ

२२ जेठ, काठमाडौं । अनलाइन माध्यमबाट यौन दुर्व्यवहार गरेको आरोपमा प्रहरीले एक युवकलाई पक्राउ परेका छन् । पक्राउ पर्नेमा जुम्लाको तिला गाउँपालिका–९ रासा घर भइ भक्तपुरको दुवाकोटमोडमा बस्ने २३ वर्षीय दिनेशकुमार राउत रहेका प्रहरीले जनाएको छ ।

राउतले टिकटकमार्फत साथी बनेर एक जना युवतीसँग फेसबुक म्यासेञ्जर, ह्वाट्स एप तथा इमोमा पनि साथी बनेको र अनलाइनबाट यौनजन्य दुर्व्यवहार गरेर त्यसको भिडियो रेकर्ड गरी ब्ल्याक मेलिङ गरेको भन्दै नेपाल प्रहरीको साइबर ब्यूरोमा उजुरी परेको थियो ।

उजुरीको आधारमा गरिएको प्रारम्भिक अनुसन्धान तथा प्राविधिक विश्लेषण गरी थप अनुसन्धानका लागि राउतलाई पक्राउ गरिएको ब्यूरोले जनाएको छ  ।
आरोपी राउतलाई विद्युतीय कारोबार ऐन २०६३ अन्तर्गतको कसूरमा छानबिन गर्न जिल्ला अदालत काठमाडौंबाट ७ दिनको म्याद थप गरिएको छ ।