अर्थमन्त्रीबाट पहुँचको आधारमा बजेट वितरण हुने काम नहोस् : सांसद गैरे

२२ जेठ, काठमाडौं । नेकपा (एमाले)का सांसद ठाकुर गैरले सरकारले पहुँचको आधारमा बजेट वितरण गरेको भन्दै आलोचना गरेका छन् ।

सोमबार प्रतिनिधिसभाको बैठकमा सरकारका तर्फबाट अर्थमन्त्री डा. प्रकाशशरण महतले पेस गरेका आगामी आर्थिक वर्षको बजेटसम्बन्धी ‘आगामी आर्थिक वर्ष २०८०/८१ को अनुमानित राजश्व तथा व्ययसम्बन्धी प्रस्ताव’माथिको छलफलमा भाग लिँदै सांसद गैरेले यस्तो बताएका हुन् । 

उनले अर्थमन्त्री महतमाथि आफ्नो जिल्ला नुवाकोटमा व्यापक मात्रामा बजेट छुट्याइएको आफूले सुनेको भन्दै रहेक जिल्ला र जनतामाथि समान व्यवहार गर्न आग्रह गरे । ‘अर्थमन्त्रीबाट आफ्ना मान्छे र जिल्लामा मात्र बजेटको ४० प्रतिशत हिस्सा वितरण गर्ने काम भइरहेको सुनेँ’ उनले भने, ‘तर अर्थमन्त्रीको गम्भीर ध्यानाकर्षण गराउँछु, यस्तो नहोस्, मैले सुनेको कुरा गलत सावित होस् ।’

सरकारले आगामी आव २०८०÷८१ का लागि ल्याएको बजेट आवश्यकता भन्दा भावना र बरालिएको चरित्रमा आएको टिप्पणी उनले गरे । व्यापार घाटा कम गर्ने कुनै योजना नभएको र बजेटले गरिब र असल किसानको हितमा नभएको उनको तर्क थियो ।