बजेटमाथिको छलफल अवरोध गर्ने विपक्षी दलको तयारी

२३ जेठ, काठमाडौं । संघीय संसद् अन्तर्गत दुवै सदनको बैठक आज बस्दैछ । जसअनुसार प्रतिनिधिसभा र राष्ट्रियसभाको बैठक आज एकै पटक बस्न लागेको हो । बैठक बिहान ११ बजेबाट सुरु हुनेछ । 

अर्थमन्त्री प्रकाशशरण महतले बजेट बनाउने क्रममा अनधिकृत व्यक्तिलाई समावेश गराएर करका दर हेरफेर गर्दै केही निश्चत व्यवसायीलाई फाइदा पुर्याएको भन्दै विपक्षी दलहरुले संस्द अवरुद्ध गर्ने जनाएका छन् । यसको उच्चस्तरिय छानविन समिति बनाएर छानविन गर्नु पर्ने माग उनीहरुको छ ।

आजको बैठकमा सरकारले हालै प्रस्तुत गरेको आगामी आर्थिक वर्ष २०८० र ०८१ को राजस्व र व्ययको वार्षिक अनुमान (बजेट) माथि छलफल गर्ने कार्यक्रम छ । हिजोबाट सुरु भएको बजेटमाथिको छलफलले आज पनि निरन्तरता पाउने कि नपाउने भन्नेमा दुविधा नै छ ।  

बैठक सुचारु भएका सरकारले प्रस्तुत गरेको बजेट माथी प्रतिनिधिसभा सदयस्यहरूले आ–आफ्नो धारणा राख्नेछन् । गत जेठ १५ गते संसद्मा प्रस्तुत भएको राजस्व र व्ययको वार्षिक अनुमानमाथि हिजोबाट सदनमा छलफल प्रारम्भ भएको हो । 

सो अघि प्रधानमन्त्री पुष्पकमल दाहाल प्रचण्डको भारत भ्रमणको बिषयलाई लिएर गत आइतवार संसद अबरुद्ध भएको थियो भने बंगलादेश जाने मार्गका लागि कालापानी साटफेर गर्ने बिषयमा प्रधानमन्त्री दाहालसँग प्रमुख प्रतिपक्ष दललगायतले जवाफ माग गरे पछि बजेट माथीको छलफल सहज तरिकाले अघि बढन सकेको थिएन । 

सोमवार प्रधानमन्त्री प्रचण्डले जवाफ दिइसकेकाले बजेट माथीको छलफलले निरन्तरता दिन लागिएको हो । आजको बैठक पनि विपक्षी दलहरुले अवरोध गर्ने बताएका छन् ।