प्रतिनिधिसभा बैठक अझै सुरु भएन, करको दर हेरफेर विषयले बैठकमा हंगामा हुने संकेत

२३ जेठ, काठमाडौं । मंगलबार बिहान ११ बजेका लागि बोलाइएको प्रतिनिधिसभाको बैठक अझै सुरु हुन सकेको छैन । तोकिएको समयभन्दा एक घण्टा ढिला हुँदा पनि बैठकबारे संसद सचिवालयले केही जनाएको छैन । 

आजको बैठकमा प्रतिपक्षी दल राप्रपाले अर्थमन्त्री डा. प्रकाशशरण महतमाथि जेठ १५ मा आगामी आव २०८०÷८१ को बजेट प्रस्तुत गर्नु अघिल्लो रात अनाधिकृत व्यक्ति (अवकाश प्राप्त नासु)लाई मन्त्रालयको गोप्य कोठामा राखेर घरानालाई फाइदा पुग्ने गरी करको दर हेरफेर गरेको आरोपमा बैठक चल्न नदिने बताएको छ । राप्रपाको यो योजनामा प्रमखु प्रतिपक्षी   एमाले र प्रतिपक्षी रास्वपाले साथ दिनेपछि बैठक सोमबारझैं असहज परिस्थिति आउने देखिएको छ । 

अहिले सभामुख देवराज घिमिरेले सर्वदलीय बैठक राखेर बैठक सुचारु गर्नेबारे छलफल गराइरहेको बताइन्छ । करको दर हेरफेरबारे सरकारले सदनमा जवाफ नदिएसम्म बैठक चल्न नदिने प्रतिपक्षी दलहरुको अडान छ । राप्रपाले सोमबारको बैठकमा कर हेरफेर घटनामाथि छानबिन गर्न संसदीय छानबिन समिति गठन गर्नुपर्ने, अन्यथा बैठक चल्न नदिने चेतावनी दिएको थियो । 

सरकारले भने दक्ष व्यक्तिलाई टाइप गर्न मात्र दिइएको, करको कुनै दर हेरफेर नगरेको अडान राखेको छ । उसले बैठकमा बजेटमाथिको छलफलका क्रममा सांसदहरुले उठाएका प्रश्नहरुको मात्र जवाफ दिने बताएपछि सहमतिको बाटो खोजी भइरहेको स्रोतले जनायो । 

नागरिकता विधेयक प्रमाणिकरण र प्रधानमन्त्री भारत भ्रमणका विषयमा प्रतिपक्षी दलहरुले जवाफ माग गर्दै सोमबार बैठक पटकपटक अवरोध पुर्याएका थिए । आजको बैठकमा बजेटमाथि सामान्य छलफल गर्ने सचिवालयको कार्यसूची छ ।