कोशी प्रदेश सरकारबाट बाहिरियो माओवादी केन्द्र

२३ जेठ, काठमाडौं । नेकपा (माओवादी केन्द्र) कोशी प्रदेश सरकारबाट बारिएको छ । कोशी प्रदेशमा एमाले नेतृत्वको सरकारलाई दिँद आएको समर्थन फिर्ता लिने निर्णय गरेको छ ।

कोशी प्रदेश संसदीय दल र  माओवादी  केन्द्र प्रदेश कार्यालयको आज बसेको बैठकले एमाले नेता हिक्मतकुमार कार्की नेतृत्वको सरकारलाई दिएको समर्थन आजै फिर्ता लिने निर्णय गरेको छ । 

सोही अनुसार माओवादी केन्द्र संसदीय दलले आफ्ना मन्त्रीलाई राजीनामा बुझाउन निर्देशन दिइसकेको पार्टीका कोशी प्रदेश कार्यालय जनाएको छ । 

प्रदेश सरकारमा माओवादी केन्द्रबाट दुर्गा चापागाईं भौतिक पूर्वाधार र जीवन आचार्य पर्यटन वन तथा वातावरण मन्त्री छन् । प्रदेशमा माओवादी केन्द्रको नेतृत्वमा सरकार गठनका लागि पहल गर्न सहमति पनि बनाइएको छ । संसदीय दलका नेता इन्द्रबहादुर आङ्बो छन् । तथापि कांग्रेसले पनि सरकारको नेतृत्व दाबी गर्दै आइरहेको छ ।

केन्द्र सरकारको नेतृत्वमा रहेको माओवादी केन्द्रलाई केन्द्रको गठबन्धनअनुसार कोशीमा सरकार गठन हुनुपर्ने माग नेपाली कांग्रेसले राख्दै आइरहेको छ । कांग्रेसका आग्रहमा गठबन्धनका एक घटक जसपाले यसअघि नै कोशी सरकारबाट बाहिर आइसकेको छ । उसले सरकारमा रहेका एक मन्त्रीलाई फिर्ता ल्याइसकेको छ ।