संसदबाहिर लोगो देखाउन किन डराउँछन सांसद ?

२४ जेठ, काठमाडौं । बुधबारको राष्ट्रियसभा बैठकमा प्रतिनिधिसभााका सांसदहरुको चर्चा भयो । उनीहरुले प्रतिनिधिसभा बैठकमा देखाएको हर्कतलाई लिएर राष्ट्रियसभाका सांसदहरुले चिन्ता व्यक्त गर्दै भने त्यो रोग हाम्रोमा नसरोस । राष्ट्रियसभामा सांसदहरुले चर्चा गरे जस्तै सडमा पनि सांसदको मर्यादाको यस्तै चर्चा हुन्छ ।   

प्रतिनिधिसभा बैठकमा सांसदहरु अमर्यादित ढंगले प्रस्तुत भएको भन्दै राष्ट्रियसभा सदस्यहरुले चिन्ता व्यक्त गर्नु स्वभाविक थियो । बैठकमा सदस्यहरु गोमादेवी ढकाल, नारायण दाहाल र सुरेश आलेमगरले प्रतिनिधिसभा बैठकमा सदस्यहरु अमर्यादित ढंगले प्रस्तुत भएको गुनासो मात्र गरेनन् त्यस्तो अमर्यादित भएर कुनै पनि सदस्यलाई बैठकमा नआउन आग्रह पनि गरे । 

सदस्य सुरेश आलेमगरले भने, ‘कसैले एउटा सन्दर्भमा भनेका सामान्य कुरालाई पनि उछालेर भन्ने एउटा रोग हाम्रो छिमेक घरमा देखा पर्यो । त्यो रोग हाम्रो यो घरमा पनि सर्छ कि भन्ने मलाई डर लागिरहेको छ ।’ यसैगरी दाहालले नियमावली र मूल्यमान्यता विपरीत गएर अवरोध हुने गर्दा यसले राम्रो सन्देश नदिएको बताए ।  

हुन पनि सोमबारको प्रतिनिधिसभा बैठक कुनै मादक पदार्थले मातेको व्यक्तिले देखाउने चर्तिकलाभन्दा कम थिएन । मानौ यो संसद नभएर कुनै भट्टि पसल हो । भट्टिमा बसेका मादक पदार्थ सेवन कर्ताहरु बरु अलि बढी मर्यादित हुन्छन् । प्रतिनिधिसभामा देखाउने यस्तै हर्कतले गर्दा प्राय सबैजसो सांसदहरु सडक वा सार्वजनिक ठाउँमा जाँदा हिजो आज संसदको लोगो देखाउदैनन् । यो सोमबारको घटनाले मात्र भएको होइन् । प्राय बैठकमा सांसद अमर्यादित नै देखिन्छन् ।  
 
एक सांसद भन्छन,‘अहिले राजनीतिक दलप्रति जनता आक्रासित छन् । कुन बेला कसको दिमागमा के चढेको हुन्छ । सांसदको लोगो देखेपछि उनीहरु आक्रमक भएर आइलाग्छन् । विनाकामको तनाव उत्पन्न हुन्छ र उरु सर्वसाधारण जस्तै लोगो लुकाएर हिड्ने गर्छ ।’ संसदमा अमार्यादित हर्कत गर्ने र सांसद सडकमा चिनिए भने उनीमाथि हातपात नहोला भन्न सकिने स्थिति अहिले छैन् । 

संसद बैठकमा मर्यादाभन्दा बाहिर गएर नृत्य देखाउन सांसदको संख्या धेरै नभएपनि यसको प्रभाव भने लागो लगाउने सबै सांसदमा परेको छ । पहिले सांसदभन्दा जता ततै सम्मान र इज्त दिइन्थ्यो । तर, अहिले आफ्नै कारण सांसदहरु सडकमा हिडन समेत लायक देखिएका छैनन् । डराइ डराइ र लोगो लुकाएर हिड्नु परेको छ । उनीहरुले बैठकमा प्रयोग गर्ने भाषाको पनि आज भोली सडकमा चर्चा हुन थालेको छ ।   

सरकारी कार्यालयमा पनि खुलेर सांसदहरु प्रस्तुत हुन सक्दैनन् । सडकमा भेटिएका प्राय सांसदले संसदको लोगो देखाएको हुँँदैन । सांसदको काम जनताका लागि नियम कानुन बनाउने हो । उनीहरु जनताबाट निर्वाचित प्रतिनिधि हुन् । तर, तीनै जनताबाट चुनिएका प्रतिनिधि अहिले जनताको माझमा जान पनि लोगो लुकाएर जानुपरेको छ ।