प्रधानमन्त्रीबाट राष्ट्रघाती काम भयोः सांसद

२४ जेठ, काठमाडौं । राष्ट्रियसभा सांसदले प्रधानमन्त्री पुष्पकमल दाहाल प्रचण्डले भारत भ्रमणको क्रममा राष्ट्रघाती नीति अवलम्वन गरेको आरोप लगाएका छन् । बुधबारको राष्ट्रियसभा बैठकमा प्रधानमन्त्री प्रचण्डले भारत भ्रमणको बारेमा जानकारी गराएपछि प्रश्न गरेका सांसदहरूले सीमाको विषय र ऊर्जाको विषयमा राष्ट्रघात हुने गरी काम गरेको बताए । 

सांसद भवगती न्यौपानेले भारत भ्रमण जानुभन्दा अगाडि राष्ट्रपतिबाट नागरिकता विधेयक प्रमाणीकरण गराएर प्रम प्रचण्डले नागरिकता विधेयक कोसेली लिएर भारत गएको आरोप लगाइन् । उनले ऊर्जा सम्झौता गर्दा फुकोट कर्णाली पनि भारतलाई सुम्पिनु राष्ट्रघात नीति भएको भन्दै चुक्ने र झुक्ने किन भयो भन्ने प्रश्न गरिन् ।

 
सांसद इन्दिरादेवी गौतमले पनि फुकोट कर्णाली हाइड्रो बनाउने सहमति भएको हो भने के सहमति भएको हो र नेपालले पानी कति प्राप्त गर्छ ? भन्दै प्रश्न गरिन् । उनले व्यापार सन्धिको विषयमा समेत प्रश्न उठाइन् । सांसद रामचन्द्र राईले भारतीय संसद् भवनमा राखिएको नक्सामा नेपालको भूभाग राखिएको भन्दै यसमा कहिले स्पष्टीकरण सोध्ने भन्दै प्रश्न गरे । 

अर्का सांसद अनिता देवकोटाले भने सार्कको भविष्य के भयो ? शिखर सम्मेलन कहिले, कहाँ हुन्छ ? भारतका प्रधानमन्त्रीसँग कुरा के भयो भन्दै प्रश्न गरिन् । उनले नयाँ एयर रुट र कालापानीबाट भारतीय सैनिक हटाउने कुरा के भयो ? अरु सीमा विवादमा कुरा के भयो भन्दै प्रश्न उठाइन् ।

सांसद जितेन्द्रनारायण देवले भने भारत भ्रमण युगान्तकारी र ऐतिहासिक भएको भन्दै प्रशंसा गरे । अर्का सांसदद्वय सारदादेवी भट्ट र भैरवसुन्दर श्रेष्ठले लिपुलेक, कालापानी साटेर बंगलादेशसँग जाने मार्गको विषय के हो भन्दै प्रश्न उठाए ।

सांसद डा विमला राई पौडेलले गान्धीको समाधिस्थलमा मोबाइलको फोटो खिचेकोप्रति आपत्ति जनाइन् । उनले आधिकारिक फोटोग्राफर थिए कि थिएनन् ? मोबाइल फोटो खिच्न मिल्छ कि मिल्दैन ? भन्दै प्रश्न गरिन् । साथै, उनले ईपीजीको कुरा उठाउँदा माहोल बिग्रिन्छ भन्नु अचम्मको भएको भन्दै यर्थाथ माग गरिन् । सांसद गोपाल भट्टराईले पनि एयर रुटको विषयमा प्रश्न उठाए ।