कांग्रेसले माग्यो मुख्यमन्त्री कार्कीको राजीनामा

२४ जेठ, मोरङ । नेपाली कांग्रेस कोशी प्रदेश संसदीय दलले अल्पमतमा परेका मुख्यमन्त्री हिक्मतकुमार कार्कीको राजीनामा माग गरेको छ । मुख्यमन्त्री कार्कीले भने संसद अधिवेशन अन्त्य गरेर अध्यादेशमार्फत बजेट ल्याउने तयारी गरेको समाचार आइरहेका बेला राजीनामा माग गरेको हो । 

कांग्रेस कोशी प्रदेश संसदीय दलका प्रमुख सचेतक भूपेन्द्र राईले आज विज्ञप्ति जारी गर्दै अल्पमतमा परेका मुख्यमन्त्री कार्कीलाई नयाँ सरकार गठनका लागि मार्ग प्रशस्त गर्न माग गरेका छन् ।

‘अर्को सूचना जारी नभएसम्मका लागि प्रदेशसभाको अधिवेशन स्थगन गर्नुले यो सरकार गैरजिम्मेवार र  प्रदेशमा झन समस्या थप्न तिर उद्धत भएको प्रष्ट हुन्छ  । लोकतान्त्रिक मूल्य मान्यतालाई आत्मसाथ गर्दै अल्पमतमा रहेको सरकारले नैतिक रुपमा राजीनामा दिएर लोकतान्त्रिक मान्यता अनुरुप आगामी सरकार निर्माण गर्नका लागि मार्ग प्रशस्त गर्न समेत आग्रह गर्दछौं’ विज्ञप्तिमा भनिएको छ ।

जसपा र माओवादी केन्द्रले सरकारलाई दिँदै आएको समर्थन फिर्ता लिएपछि कार्की अल्पमतमा परेका छन् । माओवादी केन्द्रले मंगलबार मात्र सरकारलाई दिँदै आएको समर्थन फिर्ता गरी सरकारमा रहेका २ मन्त्रीलाई फिर्ता ल्याएको हो ।