निर्वाचन आयोगले बोलायो सर्वदलीय बैठक, जिल्ला निर्वाचन कार्यालय खारेजीविरुद्धकाे छलफल मुख्य एजेण्डा

२४ जेठ, काठमाडौं । निर्वाचन आयोगले प्रतिनिधिसभा र प्रदेश सभामा प्रतिनिधित्व गर्ने राजनीतिक दलहरुको सर्वदलीय बैठक बोलाएको छ । 

आयोगका पदाधिकारीहरूको बुधवार बसेको बैठकले सरकारले जिल्ला निर्वाचन कार्यालय हटाई जिल्ला प्रशासन कार्यालय मातहतको इकाईमा रूपान्तर गर्ने प्रस्तावबारे छलफलका लागि बैठक बोलाउने निर्णय लिएको हो । बैठक जेठ २६ गते बिहान साढे ११ बजे सर्वदलीय बैठक  बस्ने निर्णय भएको आयोगले जनाएको छ ।

सरकारले आगामी आर्थिक वर्ष २०८०/८१ को बजेटमा जिल्ला निर्वाचन कार्यालयलाई खारेज गरी सीडीओ कार्यालय मातहतबाट संचालन गर्ने भनी गरिएको व्यवस्थाप्रति आयोग रुष्ट बनेको छ । सर्वदलीय बैठकको मुख्य एजेण्डा यही विषयलाई बनाइएको छ । 

साथै विदेशमा रहेका नेपालीहरूको प्रारम्भिक मतादाता नामावली सङ्कलन प्रारम्भ गर्ने विषय र राजनीतिक दलले पेस गरेको लेखा तथा लेखा परीक्षण गरी ५ वटा विषयमा छलफल गर्ने गरी बैठक बोलाइएको जनाएको छ । बजेट वक्तव्यमा सरकारले विभिन्न कारणले विदेशमा रहेका नेपालीहरुलाई रहेकै मुलुकबाट निर्वाचनमा मतदान गर्ने व्यवस्था गरिने जनाएको छ । 

बजेटमाथि अहिले संसदको दुवै सदनमा सांसदहरुले धारणा राख्ने क्रम चलिरहेको छ । धारणा राख्ने अधिकांश सांसदहरुले जिल्ला निर्वाचन कार्यालय खारेज गर्ने नीति फिर्ता लिन सरकारसँग माग गरेका छन् ।