शेयरबजार सीमित व्यक्तिको पाेल्टामा पर्नबाट राेक्न बोर्डलाई अर्थमन्त्रीको निर्देशन

२५ जेष्ठ काठमाडौं । अर्थमन्त्री डा. प्रकाशशरण महतले शेयरबजार सीमित व्यक्तिको फाइदामा केन्द्रित हुनबाट जाेगाउन धितोपत्र बोर्डलाई निर्देशन दिएका छन् । 

बिहीबार नेपाल धितोपत्र बोर्डको ३१औ वार्षिकोत्सव कार्यक्रममा बोल्दै मन्त्री डा. महतले शेयर बजार घटाउने र बढाउने काममा चलखेल चलेको खबर सुनिएको औल्याउँदै सुक्ष्म रुपमा अनुगमन गर्न निर्देशन दिए । 

सीमित व्यक्तिले शेयर बजारमा विभिन्न वाहानामा लगानीकर्ताको नाम बोचेर चलखेल गर्ने काम भएको भन्दै त्यसलाई रोक्न निर्देशन दिए । उनले शेयर बजारमा ५६ लाख लगानीकर्ता रहेको र यसमा सीमित व्यक्तिले मात्रै लाभ लिने गरेको बताए । पछिल्लो समयमा शेयर बजारमा जलविद्युत कम्पनी बढी आइरहेको र त्यसपछि उद्योगी व्यवसायी रहेको बताए । 

साना लगानीकर्तालाई आयकरमा जोड्न खोजेको भन्ने कुरा हल्ला माध भएको र हल्लामा विश्वास नगर्न आग्रह गरे । मुख्यगरी समाजिक संजालमार्फत साना लगानीकर्ताहरुलाई हतोत्साहित तुल्याउने उद्देश्यले सीमित लगानीकर्ताहरुले आयकरबारे गलत प्रचार गरी बजारमा चलखेल गरिरहेकाप्रति सजग रहन आग्रह गरे । 
सरकारबाट शेयर बजारलाई कमजोर गर्ने र यसप्रतिको विश्वासलाई कमजोर बनाउने कुनैपनि काम नहुन स्पष्ट पारे । 

 उनले बैंकमा राख्ने ब्याजभन्दा धेरै फाइदा हुने विश्वासले शेयर बजारमा लगानी गर्नेहरूकाे संख्या बढिरहेकाे बताउँदै आफ्नो पेट कटाएर भोलि केही होला कि भनी आउनेहरूकाे संरक्षण गर्ने जिम्मेवारी धितोपत्र बोर्डको रहेकाे बताए । यसप्रति बाेर्ड सचेत रहन उनले निर्देश दिए ।

शेयर बजारमा बैंक तथा वित्तीय संस्था र जलविद्युत कम्पनीहरु धेरै मात्रामा सूचीकृत भएको र लगानीकर्ताको लगानी सुरक्षा सुनिश्चितता गर्न  राष्ट्र बैंकले सशक्त र सहजीकरण भूमिका निर्वाह गर्न निर्देशन दिए ।