पहिचानवादीहरुको आन्दोलनः उपसभामुखमाथि आक्रमण प्रयास, एमाले नेता रानामाथि कालोमोसो

२५ जेठ, काठमाडौं । कोशी नामकरणप्रति असन्तुष्ट जनाउँदै झण्डै ४ महिनादेखि आन्दोलन गर्दै आइरहेका पहिचानवादी पक्षधरहरुले बिहीबार कोशी प्रदेशका उपसभामुख सिर्जना दनुवारमाथि आक्रमण प्रयास गरेका छन् । 

उदयपुरकाे त्रियुगा नगरपालिका कार्यक्रममा सहभागी हुन जाने क्रममा आन्दोलनकारीहरुले उनीहरू सवार गाडी गाईघाटमा रोकेर ढुंगा प्रहार गरेका छन् । उनीसँगै त्रियुगा नपाकी उपप्रमुख महेश्वरी राईमाथि पनि ढुंगामुढा गरिएको छ । उपसभामुख दनुवार गाईघाटबाट निर्वाचित एमाले सांसद हुन् । उनी एमालेबाट उपसभामुख निर्वाचित भएकी हुन् ।

एमालेका अनुसार बिहीबार इलाममा एमालेको कोशी प्रदेश संसदीय दलका उपनेता राम राना मगरमाथि पनि कालोमोसो दलेका छन् । घटनाको पुष्टि कोशी नाम खारेजी संघर्ष समितिका संयोजक डकेन्द्र सिंह थेगिमले गरेका छन् । उनले नेता मगरलाई गाडीमा कालो मोसो हालेर ‘स्वागत’ गरिएको बताए ।

एमालेद्वारा सरकारको ध्यानाकर्षण

यसै बीच एमालेले आफ्ना पार्टीका नेता र जनप्रतिनिधिहरूमाथि आन्दोलनकारीले आक्रमण र आगजनी गरी ज्यान लिने तहसम्मको आपराधिक गतिविधिमा उत्रिएको भन्दै घटनाबारे पार्टीको ध्यानाकर्षण भएको जनाएको छ । 

बजेटमाथि छलफल भइरहेको प्रतिनिधिसभाको जारी बैठकमा एमालेका प्रमुख सचेतक पदम गिरीले सभामुखमार्फत घटनामा संलग्नलाई पक्राउ गरी कारबाही गर्न सरकारसँग माग गरे । दोषीलाई कारबाहीको दायरामा नल्याइए एमाले प्रतिवादमा उत्रने चेतावनी दिए । उनले घटनाका सरकारमा रहेका दलका कार्यकर्ताहरूको संलग्नता रहेको आरोप लगाए ।