एमालेले तयारीका साथ दनक दिनुपर्ने बेला आयोः ओली

२५ जेठ, काठमाडौं । नेकपा एमालेका अध्यक्ष केपी शर्मा ओलीले प्रधानमन्त्री पुष्पकमल दाहाल प्रचण्डले एमालेसँग मुठभेड गर्न चाहेको बताएका छन् । उनले प्रधानमन्त्री प्रचण्डले जातजातिका नाममा देशमा दङ्गाफसाद गराउने षडयन्त्र गरिरहेको भन्दै यसका विरुद्ध एमाले चुप लागेर बस्न नहुने बताएका हुन् । सत्तापक्षकै तयारीमा एमालेमाथि भौतिक आक्रमण भएको ओलीको भनाइ छ । 

ओलीले सरकारले पहिचानवादीहरूलाई प्रोत्साहित गरी एमालेमाथि आक्रमण गराइरहेको आरोप लगाएका छन् । बिहीबार पार्टी केन्द्रीय कार्यालय च्यासलमा एकीकृत समाजवादी परित्याग गरी एमालेमा समाहित भएका नेता–कार्यकर्तालाई स्वागत गर्दै उनले कोशी प्रदेशमा सत्ता संरक्षित आपराधिक घटनाहरू भइरहेको बताए । पहिचानवादका नाममा सत्तापक्ष नै मुठभेड गराउन लागिपरेको भन्दै उनले एमाले प्रतिवादमा उत्रिने बताए ।

नेपाललाई जातजातिका नाममा दङ्गाफसाद गराउने षडयन्त्रबाट पुष्पकमल दाहालले देशभर पहिचानको विष फैलाउने कोसिस गरेको गम्भीर आरोप लगाउँदै ओलीले प्रचण्डपथ देशद्रोही र अपराधी पथ भएको जिकिर गरे । नेपाललाई जातजातिका नाममा दङ्गाफसाद गराउने, यो किरात प्रदेश राख्न खोजेको किन रहेछ भने हामीले देख्दैछौँ, नराख्दा यस्तो छ, राख्ने भए के हुन्थ्यो, ओलीले भने । 

उनले भने, ‘गैरकिरात त बस्न पनि नपाउने अवस्था बन्ने रहेछ नि त । प्रचण्डले सकेन यो विषको आगो फैलाउन, प्रचण्डले खोजेको हो, देशभर विषको आगो फैलाउन, पहिचानको राजनीति ल्याउन, जात जातका राज्य, यो कोसिस गरेको हो । भड्काउन, बिथोल्न खोजेको हो । प्रचण्डहरूको यसमा प्रत्यक्ष संलग्नता देखियो । नाम राख्ने, अलि पछि गल्ती भयो भन्ने पुनः विचार गर्नुपर्छ भन्ने र त्यता मान्छे भड्काउने । प्रचण्ड भनेको एकछिनमा पहिचानवादी, एकछिनमा राष्ट्रियतावादी हो । एकछिनमा फाटोवादी, एकछिनमा तमासा ।’